თავდაცვის სამინისტროს დაკავბეულ მაღალჩინოსნებს საზოგადოების ცნობილი სახეები და დეპუტატების ნაწილი თავდებში უდგებიან. როგორც უწყების ყოფილი თანამშრომლების ადვოკატებმა განაცხადეს აღკვეთის ღონისძიების შეცვლის მოთხოვნით შუამდგომლობას სასამართლოში უახლოეს პერიოდში წარადგენენ.
მათივე განმარტებით, დეპუტატებს შორის არიან როგორც ,,რესპუბლიკელები", ასევე "თავისუფალი დემოკრატები" და ,,ეროვნული ფორუმის" წევრები.
დაკავებულებს თავდებში უდგებიან: ელდარ შენგელაია, ვახტანგ კახიძე, ჯემალ სეფიაშვილი, ზურაბ აბაშიძე, ანი მიროტაძე, შალვა კიკნაველიძე, ვიქტორ დოლიძე, ირაკლი ჩიქოვანი, თამაზ შიოშვილი, თემურ მაისურაძე, მალხაზ ვახტანგაშვილი, ლევან ბერძენიშვილი, ნოდარ ებანოიძე, თინა ხიდაშელი, დავით ბერძენიშვილი, გიგლა აგულაშვილი, დავით ონოფრიშვილი, გია ცაგარეიშვილი, ნინო გოგუაძე, შალვა შავგულიძე.
ბრალდებულთა მიმართ პატიმრობის არასაპატიმრო აღკვეთი ღონისძიებით შეცვლის თაობაზე განცხადებას ხელს აწერენ: რატი ამაღლობელი, დავით მაღრაძე, გიორგი ხოშტარია, ნიკოლოზ რაჭველი, ლიზა ბაგრატიონი, ნატო მეტონიძე, კოტე ჯანდიერი, გია ყარყარაშვილი, თემურ ნანუაშვილი, მამუკა მიქელაძე, რომან შაქარიშვილი, ლალი ჩიკვაიძე, ნანა შონია, ბასა და თამარ ფოცხიშვილები, მიხეილ ყაველაშვილი და თამაზ ჯოლოგუა.
საქალაქო სასამართლოს გადაწყვეტილებით, თავდაცვის სამინისტროს 5 თანამშრომელს აღკვეთის ღონისძიებად, 2-თვიანი წინასწარი პატიმრობა შეეფარდა.
დაკავებულებს, გამოძიება სახელმწიფო ბიუჯეტის კუთვნილი 4 102 872 ლარის გაფლანგვის ედავება.
გამოძიების ინფორმაციით, 2013 წელს, თავდაცვის სამინისტროს მიერ ორგანიზებული საიდუმლო სახელმწიფო შესყიდვის მიმდინარეობისას, უპირატესობის „სილქნეტის" მიენიჭა. პროკურატურის განცხადებით, ხელშეკრულებით თავდაცვის სამინისტრომ სს „სილქნეტს" უნდა გადაუხადოს ჯამში 6 720 877.42 ლარი, საიდანაც წინასწარ (ავანსად) გადარიცხულია უკვე 6 480 877.42 ლარი, სანაცვლოდ კი თავდაცვის სამინისტრომ სს „სილქნეტისგან" 2015 წლის 16 იანვარს უნდა მიიღოს ქონება და მომსახურება, რომლის რეალური საბაზრო ღირებულება ექსპერტიზის დასკვნის შესაბამისად შეადგენს მხოლოდ 2 618 004.82 ლარს.