აჭარის განთავსების საშუალებებში გრანდიოზული ფასდაკლებები დაიწყო. კერძო სექტორისა და აჭარის ტურიზმის დეპარტამენტს შორის მიღწეული შეთანხმების მიხედვით, საახალწლოდ და ზოგადად ზამთრის სეზონზე აჭარაში სასტუმროები ადგილობრივ ტურისტებს ფასდაკლებით მოემსახურებიან. ფასდაკლების აქცია 25 დეკემბრიდან დაიწყება და 1 მარტამდე გასტანს და ის 30-დან 50 %-მდე ფასდაკლებას ითვალისწინებს.
პროექტი - „უპრეცედენტო ფასდაკლებების სეზონი აჭარაში" კერძო სექტორის სტიმულირებასა და არასეზონურ პერიოდში შიდა ტურისტების მოზიდვას შეუწყობს ხელს. როგორც აჭარის ტურიზმის დეპარტამენტში აცხადებენ, ის 5 სეზონის განმავლობაში გაგრძელდება და საბოლოო ასახვას კი სექტორზე რამდენიმე წლის შემდეგ პოვებს.
აჭარის ტურიზმის დეპარტამენტის თავმჯდომარის მოადგილის მამუკა ბერძენიშვილის განმარტებით, ყველაფერი კეთდება იმისათვის, რომ შიდა ტურიზმი განვითარდეს, მოხდეს მისი სტიმულირება, რაც საბოლოო ჯამში თავად ტურიზმის სექტორის განვითარებაზე პოვებს დადებით ასახვას. პროექტი მოიცავს როგორც სასტუმროებს, მათ სერვისსა და პროდუქტს, ასევე სხვადასხვა ტურისტულ ობიექტებში ფასდაკლებებს, უფასო კონცერტებსა და კულტურულ ღონისძიებებს.
ფასდაკლებების სეზონში მონაწილეობის მსურველებს შეუძლიათ იხილონ სპეციალურად შექმნილი ვებ-გვერდი: batumievents.com და ინფორმაციის მიღებასთან ერთად ისარგებლონ არსებული შემოთავაზებებით.
„ყველა პროცესი, რომელიც პარალელურად მიმდინარეობს ემსახურება შიდა ტურიზმის სტიმულირებას. მოგეხსენებათ, საქართველოში ტურიზმი ძირითადად ეფუძნება უცხოელი ტურისტების მოზიდვას. უცხოელი ტურისტების ზრდის ხარჯზე იზრდება საქართველოში ზოგადად ტურისტების რაოდენობა, მაგრამ არ ხდება პარალელურ რეჟიმში შიდა ტურიზმის სტიმულირება. ჩვენ ეს მიმართულება აუცილებლად უნდა გამოვიყენოთ, რადგანაც ადგილზე მყოფი ტურისტები და მოსახლეობა არის ის სამიზნე ჯგუფი, რომელთა მოზიდვაც უფრო მარტივია. ზოგადად ცხოვრების წესი და გეოგრაფიული სიახლოვე, მენტალიტეტი ხელს გვიწყობს. სწორედ ამ ფონზე გადავწყვიტეთ შიდა ტურიზმის სტიმულირება უფრო გაგვეაქტიურებინა. ამის შემადგენელია პრესტურები ქართველი ჟურნალისტებისათვის და ეს პროცესი კიდევ უფრო აქტიურად გაგრძელდება 2015 წელს. ფასდაკლებების სეზონი და საახალწლო ღონისძიებებიც მიმართულია იმისკენ, რომ მოვახდინოთ შიდა ტურისტების სტიმულირება და ისინი მოვიწვიოთ აჭარაში"- განაცხადა მამუკა ბერძენიშვილმა.