საქართველოს საგარეო მინისტრ მაია ფანჯიკიძის განცხადებით, გასული წელი საქართველოს საგარეო პოლიტიკის კუთხით იყო ყველაზე წარმატებული წელი საქართველოს დამოუკიდებლობის დღიდან. ამის შესახებ მინისტრმა პარლამენტში, განცხადა.
მთავრობის განახლებული შემადგენლობა საქართველოს პარლამენტს ეწვია და მინისტრებთან შეხვედრა კომიტეტებში დარგობრივი პროფილის მიხედვით შედგა. საგარეო საქმეთა მინისტრს მაია ფანჯიკიძეს, სახელმწიფო მინისტრს ევროპულ და ევროატლანტიკურ სტრუქტურებში ინტეგრაციის საკითხებში ალექსი პეტრიაშვილს, სახელმწიფო მინისტრს შერიგებისა და სამოქალაქო თანასწორობის საკითხებში პაატა ზაქარეიშვილს და სახელმწიფო მინისტრს დიასპორის საკითხებში გელა დუმბაძეს საგარეო ურთიერთობათა, ევროპასთან ინტეგრაციის, დისპორისა და კავკასიის საკითხთა კომიტეტების და ტერიტორიული მთლიანობის აღდგენის საკითხთა დროებითი კომისიის გაერთიანებულ სხდომაზე მოუსმინეს.
მინისტრებმა ისაუბრეს მათდამი დაქვემდებარებული უწყებების მიერ განხორციელებულ საქმიანობაზე, სამუშაო გეგმებსა და პრიორიტეტებზე.
როგორც მაია ფანჯიკიძემ განაცხადა, საქართველოს სახელმწიფოს საგარეო პრიორიტეტები არ შეცვლილა და ამ მიმართულებით საგარეო უწყებამ მთავრობასთან ერთად მნიშვნელოვან წარმატებებს მიაღწია. განსაკუთრებით მნიშვნელოვან მოვლენებს შორისაა: ასოცირების ხელშეკრულების ხელმოწერა; ნატოსთან უპრეცედენტო დაახლოება, რომლის შესახებ დეკლარაცია გაკეთდება ნატო-ს სამიტზე სექტემბერში; რუსეთთან ურთიერთობის დალაგება ზოგიერთ სფეროში; სამხრეთ ოსეთისა და აფხაზეთის, როგორც დამოუკიდებელი ქვეყნების აღიარებათა რიცხვის ორით შემცირება (მათ დამოუკიდებლობას ახლა მხოლოდ სამი ქვეყანა აღიარებს); გაეროს რეზოლუცია საქართველოსთან დაკავშირებით, რომლის მხარდამჭერთა რიცხვი გაიზარდა 7-ით, ხოლო მოწინააღმდეგეთა რიცხვი შემცირდა - 3-ით.
მინისტრის თქმით, ასევე ხაზგასმით უნდა აღინიშნოს, საქართველოს, როგორც საერთაშორისო ფაქტორის როლის გაძლიერება საერთაშორისო ასპარეზზე, რაც გამოიხატა საქართველოს მონაწილეობით სხვადასხვა საერთაშორისო მისიებში. როგორც მაია ფანჯიკიძემ აღნიშნა, გასული წლის განმავლობაში თბილისი იქცა საერთაშორისო პოლიტიკური ინტერესის ერთ-ერთ ყველაზე გამოხატულ ცენტრად: ქვეყანაში შედგა ექვსი პრეზიდენტისა და ორი პრემიერის ვიზიტი, საქართველოს ეწვია 21 ქვეყნის საგარეო საქმეთა მინისტრი და რამდენიმე მნიშვნელოვანი საერთაშორისო ორგანიზაციის ხელმძღვანელი, ასევე შედგა მრავალი საპარლამენტო დელეგაციის ვიზიტი და ა.შ.
„ეს საგარეო პოლიტიკის ძალიან დიდ წარმატებად მიმაჩნია გასული წელიწადნახევრის განმავლობაში და მომავალშიც ამავე მიმართულებით ვაპირებთ საქმიანობის გაგრძელებას. რასაკვირველია გამოწვევები რჩება, როგორიცაა ჟენევის მოლაპარაკებები, სიტუაცია ოკუპირებულ ტერიტორიებზე და ამ მიმართულებით არსებული სირთულეები, რომელთა გადაჭრაზეც აქტიურად ვმუშაობთ და სხვა", - განაცხადა მაია ფანჯიკიძემ, რომლის შეფასებით, საგარეო მიმართულებით მართლაც წარმატებული რეფორმები განხორციელდა და ამაზე თავად ფაქტები მეტყველებენ.