საქართველოს პრეზიდენტისა და მთავრობის მიერ პარლამენტისათვის სარატიფიკაციოდ წარდგენილი დოკუმენტები განიხილეს ევროპასთან ინტეგრაციის კომიტეტის სხდომაზე. საკითხები განსახილველად ფინანსთა მინისტრის მოადგილემ გიორგი ჯავახიშვილმა გამოიტანა.
კერძოდ, „საქართველოსა და გერმანიის ფედერაციულ რესპუბლიკას შორის შემოსავლებსა და კაპიტალზე ორმაგი დაბეგვრის თავიდან აცილების შესახებ 2006 წლის 1 ივნისის შეთანხმებაში ცვლილებების შეტანის შესახებ" ოქმს 2014 წლის 11 მარტს მოეწერა ხელი. ცვლილებები შედის იმ მუხლში, რომელიც ინფორმაციის გაცვლას ეხება. როგორც სხდომაზე აღინიშნა, შემოსავლებსა და კაპიტალზე ორმაგი დაბეგვრის თავიდან აცილების შესახებ შეთანხმებების დადება, ასევე ძველი ხელშეკრულებების გადახედვა და საგადასახადო პოლიტიკაში განხორციელებული ცვლილებებისა თუ სხვა მიზნით მათში გარკვეული ცვლილებების შეტანა, განსაკუთრებით იმ ქვეყნებთან, რომლებთანაც საქართველოს აქტიური სავაჭრო-ეკონომიკური ურთიერთობა აკავშირებს, მნიშვნელოვანია ქვეყნის ეკონომიკური ურთიერთობების გაფართოებისა და გაუმჯობესების თვალსაზრისით.
„საქართევლოს მთავრობასა და საფრანგეთის რესპუბლიკის მთავრობას შორის საქართველოში საფრანგეთის განვითარების სააგენტოსა და ეკონომიკური თანამშრომლობის ხელშეწყობის და განვითარების საზოგადოების დაფუძნებისა და საქმიანობის შესახებ" შეთანხმებას 2014 წლის 13 მაისს მოეწერა ხელი და იგი საშუალებას მისცემს AFD ჯგუფს, რომელიც საფრანგეთის განვითარების სააგენტოსა და მისი დამხმარე ორგანიზაციისგან შედგება, საქართველოს ტერიტორიაზე დაიწყოს საქმიანობა და განახორციელოს ფინანსური და ტექნიკური დახმარება, ინვესტიცია საინვესტიციო ფონდებში, ასევე გაწიოს საკონსულტაციო საქმიანობა, ჩაატაროს ტრენინგები.როგორც ,,ჯი-ეიჩ-ენს" პარალემენტიდან აცნობეს კომიტეტში მიაჩნიათ, ეს შეთანხმება ხელს შეუწყობს საქართველოსა და საფრანგეთის ეკონომიკური ურთიერთობების შემდგომ გაღრმავებას, საქართველოს ეკონომიკურ განვითარებას და ევროკავშირთან ასოცირების შეთანხმების სავაჭრო და ეკონომიკური თანამშრომლობის ნაწილით გათვალისწინებული დებულებების იმპლემენტაციას.
ამავე სხდომაზე განიხილეს საქართევლოს მთავრობასა და საფრანგეთის რესპუბლიკის მთავრობას შორის ასევე 2014 წლის 13 მაისს ხელმოწერილი ფინანსური პროტოკოლი, რომელიც მიზნად ისახავს ქალაქ ჭიათურის ცენტრის პერიფერიებთან დამაკავშირებელი ურბანული მექანიკური საბაგიროების აღჭურვილობისა და მშენებლობის პროექტების შეღავათიანი სესხით დაფინანსებას. სესხის მაქსიმალური ოდენობაა 13 მილიონ 200 ათასი ევრო წლიური საპროცენტო განაკვეთით 0.17%. სესხის ხანგრძლივობა -20 წელი, 6-წლიანი საშეღავათო პერიოდით. სხდომის დასასრულს კომიტეტმა კენჭი უყარა განხილულ საკითხებს და მხარი დაუჭირა მათ გატანას პარლამენტის პლენარულ სხდომაზე.
