ნატო-ს საგარეო საქმეთა მინისტრების შეხვედრის ფარგლებში, გაიმართა სამუშაო სადილი, სადაც მოკავშირეებმა განიხილეს ნატო-ს „ღია კარის" პოლიტიკის საკითხები, მათ შორის ნატო-ს ასპირანტი ქვეყნების - საქართველოს, ბოსნიის და ჰერცეგოვინის, მონტენეგროსა და იუგოსლავიის ყოფილი რესპუბლიკა მაკედონიის მიერ მიღწეული პროგრესი. ნატო-ს გენერალური მდივნის ანდერს ფოგ რასმუსენის მიერ გაკეთებული განცხადების თანახმად, ჩრდილოატლანტიკური ალიანსის წევრები საქართველოსთან დაკავშირებით შეთანხმდნენ ახალი პაკეტის მომზადებაზე, რომელიც დაეხმარება ქვეყანას ალიანსთან პოლიტიკური, ინსტიტუციონალური და პრაქტიკული თანამშრომლობის გაღრმავებაში ნატო-სთან დაახლოების გზაზე. ასევე, სხვა ასპირანტებთან დაკავშირებით, ნატო დაიწყებს ინტენსიურ და ფოკუსირებულ მოლაპარაკებებს მონტენეგროსთან, რათა არაუგვიანეს 2015 წლის დასასრულისა მიიღოს გადაწყვეტილება მიწვეულ იქნეს თუ არა ქვეყანა ალიანსში.
25 ივნისს ნატო-ს საგარეო მინისტერიალის ფარგლებში გაიმართა შეხვედრა ავღანეთში მიმდინარე „უსაფრთხოების საერთაშორისო მხარდაჭერის ძალების" (International Security Assistance Force - ISAF) ოპერაციის ფორმატში, რომელშიც მონაწილეობა მიიღო საქართველოს საგარეო საქმეთა მინისტრმა მაია ფანჯიკიძემ.
მხარეების მიერ ერთხმად აღინიშნა ავღანეთში ახლახან ჩატარებული საპრეზიდენტო არჩევნების წარმატება და არჩევნების პროცესის დემოკრატიული პრინციპების დაცვით დასრულების მნიშვნელობა. ამას გარდა, ქვეყნებმა განიხილეს ISAF-ის ოპერაციის მიმდინარეობა და 2015 წლიდან ავღანეთის შეიარაღებული ძალების და პოლიციის გაწვრთნის და მათთვის დახმარების აღმოჩენის ახალი მისიის Resolute Support დაწყება. აღნიშნულთან დაკავშირებით ხაზი გაესვა საჭირო ლეგალური ბაზის დროულად მიღების მნიშვნელობას. შეხვედრის დასასრულს საგარეო საქმეთა მინისტრებმა მხარი დაუჭირეს Resolute Support-ის ოპერატიულ გეგმას.
ნატო-ს საგარეო მინისტერიალის მსვლელობისას საქართველოს საგარეო საქმეთა მინისტრმა მაია ფანჯიკიძემ ორმხრივი შეხვედრები გამართა გაერთიანებული სამეფოს საგარეო საქმეთა მინისტრთან უილიამ ჰეიგთან, ესტონეთის საგარეო საქმეთა მინისტრთან ურმას პაეტთან, პოლონეთის საგარეო საქმეთა მინისტრთან რადოსლავ სიკორსკისთან, პორტუგალიის საგარეო საქმეთა მინისტრთან რუი მაჩეტესთან, ლატვიის საგარეო საქმეთა მინისტრთან ედგარს რინკევიჩსთან და უკრაინის საგარეო საქმეთა მინისტრთან პავლო კლიმკინთან.
