საქართველოს საგარეო საქმეთა სამინისტროში გაიმართა ადამიანის უფლებების დაცვის საკითხებზე საქართველო-ევროკავშირის ყოველწლიური დიალოგის მეშვიდე შეხვედრა.
შეხვედრისას, საქართველოს დელეგაციას თავმჯდომარეობდა საგარეო საქმეთა მინისტრის მოადგილე თამარ ბერუჩაშვილი, ხოლო ევროკავშირის დელეგაციას ევროპული საგარეო ქმედებათა სამსახურის აღმოსავლეთ პარტნიორობის ორმხრივი სამმართველოს უფროსი დირკ შუბელი. შეხვედრაში მონაწილეობა მიიღეს საქართველოს მთავრობის შესაბამისი უწყებების, პარლამენტის, პრემიერ-მინისტრის აპარატის და ევროპული საგარეო ქმედებათა სამსახურის, ევროკომისიისა და საქართველოში ევროკავშირის დელეგაციის წარმომადგენლებმა, ასევე საქართველოს სახალხო დამცველმა.
„საგარეო საქმეთა სამინისტრო დღეს მასპინძლობს ევროკავშირ-საქართველოს პოლიტიკური დიალოგის ფორმატში ერთ-ერთ მნიშვნელოვან ყოველწლიურ შეხვედრას. დღის წესრიგის მიხედვით ტრადიციულად იქნება ძალიან დეტალური მიმოხილვა ყველა იმ რეფორმის, ღონისძიების და ნაბიჯის, რომელიც საქართველოს მთავრობამ განახორციელა შესაბამის სფეროებში. მიმოხილური იქნება საკანონმდებლო ცვლილებები, ასევე ადამიანთა უფლებების სტრატეგია და სამოქმედო გეგმა, რომელიც პირველად მიიღო საქართველოს მთავრობამ. რასაკვირველია დეტალურად განვიხილეთ ყველა ის ვალდებულებები, რაც არის საქართველოს და ევროკავშირის ასოცირების დღის წესრიგის ფარგლებით განსაზღრული. შესაბამისად ეს გახლავთ ძალიან მნიშვნელოვანი დისკუსია ყველა იმ საკითხზე, რომელიც ეხება ადამიანის უფლებების დარღვევას ოკუპირებული ტერიტორიაზე" -აღნიშნა საგარეო საქმეთა მინისტრის მოადგილემ თამარ ბერუჩაშვილმა.
საგარეო უწყების ცნობით, დიალოგის მეშვიდე შეხვედრაზე მხარეებმა მიმოიხილეს საქართველოში ადამიანის უფლებათა დაცვის კუთხით, 2013 წლის 20 ივნისის შეხვედრის შემდგომ პერიოდში გატარებული ღონისძიებები. დღის წესრიგის შესაბამისად, მსჯელობა გაიმართა მართლმსაჯულებისა და სამართალდამცავი სისტემის რეფორმის, ანტი-დისკრიმინაციული პოლიტიკისა და უმცირესობათა უფლებების დაცვის საკითხებზე. განხილულ იქნა საქართველოში ჩატარებულ 2013 წლის საპრეზიდენტო და 2014 წლის ადგილობრივ არჩევნებთან დაკავშირებული საკითხები. შეხვედრისას განსაკუთრებული ყურადღება დაეთმო საქართველოს ოკუპირებულ ტერიტორიებზე ადამიანის უფლებების დაცვის მხრივ არსებულ მდგომარეობას და იძულებით გადაადგილებულ პირთა უფლებების დაცვის პრობლემებს.
ევროკავშირის დელეგაციამ პოზიტურად შეაფასა ადამიანის უფლებათა დაცვის კუთხით საქართველოს მხარის მიერ გატარებული რეფორმები და აღუთქვა შემდგომი მხარდაჭერა.
„წლევანდელი შეხვედრა განსაკუთრებულად მნიშვნელოვანია, რადგანაც ჩვენ ვუახლოვდებით ასოცირების ხელშეკრულების ხელმოწერას და ამასთანავე ვიმყოფებით სავიზო რეჟიმის ლიბერაციის მოლაპარაკებებში. ადამიანის უფლებების თემა ორივე ამ საკითხთან მიმართებაში უზომოდ მნიშვნელოვანია. ჩვენ მივესალმეთ ანტიდისკრიმინაციული კანონის მიღებას, მაგრამ მნიშვნელოვანია ხაზი გავუსვათ იმას, რომ ეს კანონი ეხება ყველა სახის დისკრიმინაციას და არა მარტო გენდერულ დისკრიმინაციას. ჩვენ ვაფასებთ საქართველოს წინსვლას და ყურადღებით ვადევნებთ თვალს ამ კანონის იმპლემენტაციის პროცესს. ასევე მნიშვნელოვანი საკითხია სავიზო რეჟიმის ლიბერალიზაცია,"-აღნიშნა, ვეროკავშირის ელჩმა საქართველოში ფილიპ დიმიტროვმა.
