უფრო კონკრეტულად, კახეთში ადამიანის უფლებათა ცენტრის დამკვირვებლები არჩევნებს აკვირდებიან საგარეჯოსა და თელავის მუნიციპალიტეტის ეთნიკურად აზერბაიჯანელი მოქალაქეებით დასახლებულ სოფლებში: იორმუღანლო, დუზაგრამა, კეშელო, ლამბალო, ნაფარეული, ყარაჯალა და ასევე, ახმეტის მუნიციპალიტეტში, პანკისის ხეობაში, სადაც ქისტები და ჩეჩნები ცხოვრობენ. ორგანიზაციის დამკვირვებლები ასევე მუშაობენ საჩხერის მუნიციპალიტეტის კონფლიქტისპირა სოფლებში: პერევი, სინაგური, ცხომარეთი, თედელეთი, ჯრია, ჭალა, სპეთი.

ადამიანის უფლებათა ცენტრის დამკვირვებელთა მობილური ჯგუფები აღჭურვილი არიან ვიდეოკამერებით და ახდენენ არჩევნების მიმდინარეობის დოკუმენტირებას. ორგანიზაციის ინტერნეტ-გამოცემა - www.humanrights.ge უწყვეტ რეჟიმში აახლებს ინფორმაციას საარჩევნო პროცესის შესახებ, დამკვირვებელთა მიერ მოწოდებული ინფორმაციის საფუძველზე.

13:00 საათის საათისთვის ადგილობრივი თვითმმართველობის არჩევნები, ძირითადად, მიმდინარეობს მშვიდ ვითარებაში. დაფიქსირებული დარღვევები არ არის იმ სახის, რასაც შეუძლია საარჩევნო პროცესის ჩაშლა ან შედეგებზე გავლენის მოხდენა. იმ საარჩევნო უბნების უმრავლესობა, სადაც არჩევნებს ადამიანის უფლებათა ცენტრი აკვირდებოდა, დროულად გაიხსნა და მოწესრიგებულად მიიღო პირველი ამომრჩეველი.

პრობლემური ტენდენცია გამოიკვეთა ეთნიკურად აზერბაიჯანელებით დასახლებულ სოფლებში განთავსებულ საარჩევნო უბნებზე, სადაც ამომრჩევლებსა და საარჩევნო კომისიების წარმომადგენლებს შორის კომუნიკაცია აზერბაიჯანულ ენაზე მიმდინარეობს და ეს დამკვირვებლებს ხელს უშლის, არჩევნებს დააკვირდნენ სრულფასოვნად. მსგავსი ტენდენცია შეიმჩნევა ახმეტის მუნიციპალიტეტის ეთნიკურად ჩეჩენი და ქისტი მოქალაქეებით დასახლებულ სოფლებში, პანკისის ხეობაში.

ეთნიკური უმცირესობების წარმომადგენლები ხშირად ვერ ერკვევიან საარჩევნო პროცედურებში. კომისიის წევრები მათ უხსნიან ხმის მიცემის პროცედურას, მაგრამ ვინაიდან ისინი აზერბაიჯანულ ან ქისტურ ენაზე საუბრობენ, დამკვირვებლები ვერ იგებენ, ამ დროს კონკრეტულად რაზე ესაუბრებიან კომისიის წევრები ამომრჩევლებს და ხომ არ ახდენენ მათზე რაიმე სახის ზეწოლას.

ადამიანის უფლებათა ცენტრი საგარეჯოს მუნიციპალიტეტის ეთნიკური უმცირესობით დასახლებულ სოფლებში არჩევნებს 2012 და 2013 წლებშიც აკვირდებოდა. აღსანიშნავია, რომ მსგავსი პრობლემის წინაშე ორგანიზაციის დამკვირვებლები საპარლამენტო და საპრეზიდენტო არჩევნების კენჭისყრის დროს არ დამდგარან, რადგან საარჩევნო უბნებზე კომუნიკაცია ქართულ და რუსულ ენაზეც იყო შესაძლებელი.

წინა არჩევნების მსგავსად, კვლავ დაფიქსირდა ისეთი შემთხვევები, როცა კომისიის წევრები ამომრჩეველს ხმის მიცემის კაბინაში მიჰყვებიან და იქ უხსნიან, თუ როგორ უნდა შემოხაზონ ბიულეტენში კანდიდატი. მართალია, ასეთ შემთხვევებს 13:00 საათისთვის მასობრივი ხასიათი არა აქვს, მაგრამ ზოგადად, სამწუხაროა ის ფაქტი, რომ ეთნიკური უმცირესობებით დასახლებულ სოფლებში კვლავ დაბალია სამოქალაქო განათლების დონე და ამომრჩევლებს არ ესმით თავიანთი უფლებები.

ადგილობრივი თვითმმართველობის არჩევნების მონიტორინგის პროექტს ფინანსურად მხარს უჭერს ფონდი „ღია საზოგადოება - საქართველო". მონიტორინგის შედეგებზე დაყრდნობით, ადამიანის უფლებათა ცენტრი მოამზადებს ანგარიშს.

20:30 საათზე, საარჩევნო უბნების დახურვის შემდგომ, ადამიანის უფლებათა ცენტრი არასამთავრობო ორგანიზაციების მედიაცენტრში დღის შემაჯამებელ პრესკონფერენციას გამართავს.