არასამთავრობო ორგანიზაცია „ადამიანი, კანონი, თავისუფლება" უერთდება საზოგადოების უკმაყოფილებას შპს „სი-ტი პარკის" მიმართ და გამოხატავს შეშფოთებას იმ კაბალურ პირობებთან დაკავშირებით, რომელიც „სი-ტი პარკს" აქვს დაწესებული თბილისის გზებზე ავტოსატრანსპორტო საშუალებათა პარკირების სფეროში. როგორც საზოგადოებისთვისაა ცნობილი, 2007 წლის 9 ნოემბერს, მერიის მიერ გამოცხადებულ აუქციონში, შპს „ამაგონისა" და შპს „შოჰარ პარკინგ სერვისის" კონსორციუმმა გაიმარჯვა. მერიის მოთხოვნის შესაბამისად აღნიშნულმა კომპანიებმა შპს „სი-ტი პარკი" დააფუძნეს, რომელიც იღებდა ვალდებულებას ქალაქში პარკირების სისტემის მოწესრიგებისა და ახალი მიწისქვეშა და მიწისზედა ავტოსადგომების მშენებლობაზე.
„სი-ტი პარკმა" თბილისში პარკირების სისტემის ოპერირება 2009 წლის 1 მარტიდან დაიწყო. საზოგადოების პროტესტი გამოიწვია პარკირებისთვის უპრეცენდენტოდ მაღალი ტარიფების დაწესებამ, რადგან 10 ლარიანი ჯარიმა 50 ლარიანი გადასახადი და საჯარიმოზე ავტომობილის გადაყვანისთვის 70 ლარი თბილისის მოსახლეობითვის მძიმე ტვირთად იქცა.
თბილისის მოსახლეობის გარდა, რთულ მდგომარეობაშია რამოდენიმე დღით ან საათით დედაქალაქში კონკრეტული საქმისთვის ჩამოსული ავტომფლობელები. ჩვენი ქვეყნის მოსახლეობა, რომელიც ხშირად ეკონომიკური და სხვა საქმიანობისთვის ჩამოდიან, უწევთ გაწიონ პარკირების ხარჯი. ხშირია მათი მხრიდან ამ ხარჯისგან თავის არიდება, რადგან პარკირების საშვი მინიმუნ 1 კვირით უნდა შეიძინონ, რომლის ღირებულება 4 ლარს შეადგენს. ზემოხსენებული საშვის შეძენა კი უსაფუძვლოა, რადგან 1 დღით ჩამოსულმა ადამიანმა 1 კვირის საშვი უნდა იყიდოს, რომელსაც შემდგომში ვერაფერში გამოიყენებს.
აღნიშნული იწვევს ავტომანქანის მფლობელთა დაჯარიმებას და უარეს შემთხვევაში ავტომანქანის საჯარიმო სადგომზე გადაყვანას, რაც ძალიან მძიმე ტვირთია თითოეული მათგანისთვის. ორგანიზაცია მიუთითებს, რომ ამ სეგმენტისთვის არ არსებობს გადახდის რაიმე სისტემა.
აღსანიშნავია ისიც, რომ კომპანიის მიერ არ იქნა შესრულებული ვალდებულება, რომელიც პარკინგის ზონების მშენებლობას ითვალისწინებდა. ასევე, საგულისხმოა ის გარემოებაც, რომ 7 წლის წინ მერიასა და „სი-ტი პარკს" შორის დადებული ხელშეკრულების ნაწილი კვლავაც მიუწვდომელია.
არასამთავრობო ორგანიზაცია „ადამიანი კანონი თავისუფლებასთვის" გაუგებარია რატომ მიენიჭა კომპანიას პარკირების სფეროს მართვის ფაქტობრივად მონოპოლიური უფლება?! რატომ წარმოადგენს ხელშეკრულების ვადა კომერციულ საიდუმლოებას და რატომ არაა ასახული აღნიშნული ხელშეკრულების ტექსტის საჯარო ნაწილში. როგორც ორგანიზაციისათვის გახდა ცნობილი, ხელშეკრულების თანახმად, მერიას აქვს დაშვება „სი-ტი პარკის" სისტემაზე და დაუბრკოლებლივ შეუძლია დაკვირვება მის საბანკო ანგარიშებზე. გარდა ამისა, შპს „სი-ტი პარკის" მიერ გამოწერილი ჯარიმების საფასურის ჩარიცხვა ხორციელდება უშუალოდ თბილისის მერიის ანგარიშზე. კომპანია, ექსკლუზიური უფლების გათვალისწინებით, იღებს გადასახადების 40%-ს, რაც, რა თქმა უნდა დამატებით კითხვებს ბადებს. არსებობს საფუძვლიანი ეჭვი იმისა, რომ მხარეებს შორის გაფორმებულ ხელშეკრულებას ფარულ გარიგებამდე მივყავართ, სადაც კონკრეტული პირების მიერ „სი-ტი პარკის" საქმიანობის საკუთარი და მატერიალური ინტერესების შესაბამისად გამოყენება იკვეთება.
არასამთავრობო ორგანიზაცია „ადამიანი, კანონი, თავისუფლებას" მიაჩნია, რომ ხელშეკრულება გაფორმებულია მერკანტილური ფინანსური ინტერესების შესაბამისად. შესასწავლია რა ფარული შეთანხმება არსებობს მერიასა და თავად „სი-ტი პარკის" მფლობელ კომპანიას შორის. ორგანიზაცია მოუწოდებს ფინანსთა სამინისტროს საგამოძიებო სამსახურს დროულად მოახდინოს „სი-ტი პარკის" საქმიანობის გამოძიება და მაღალი საზოგადოებრივი ინტერესის გათვალისწინებით გაასაჯაროვოს გამოძიების დეტალები.