ბრიუსელში ევროკომისიის კოლეგიასა და საქართველოს მთავრობის წევრებს შორის გამართულ შეხვედრაზე მხარეებმა საქართველოში არსებული შიდაპოლიტიკური ვითარება, უსაფრთხოების საკითხები, საქართველო-ევროკავშირის თანამშრომლობის არსებული მდგომარეობა და მომავალში თანამშრომლობის პროგრესულად განვითარების გზების შესახებ იმსჯელეს.
იუსტიციის სამინისტროს ინფორმაციით, შეხვედრის დასრულების შემდეგ მხარეებმა ერთობლივი განცხადება მიიღეს, რომლის რამდენიმე პუნქტი საქართველოს იუსტიციის სამინისტროს მიერ განხორციელებულ რეფორმებსა და წარმატებულ ინიციატივებს ეხება. კერძოდ, აღნიშნულია საქართველოს პროგრესი ხელისუფლების დემოკრატიული გზით გადაცემის, ვიზალიბერალიზაციისა და მართლმსაჯულების სისტემის რეფორმირების პროცესში.
ერთობლივ განცხადებაში ნათქვამია, რომ საქართველოში დემოკრატიული პროცესების გაძლიერებისათვის აუცილებელია 15 ივნისის ადგილობრივი თვითმმართველობის არჩევნების ისეთივე დემოკრატიულ და თავისუფალ გარემოში ჩატარება, როგორშიც 2012 და 2013 წლის საპარლამენტო და საპრეზიდენტო არჩევნები ჩატარდა.
ევროკომისიისა და საქართველოს მთავრობის ერთობლივი შეფასებით, ხალხთაშორისი ურთიერთობები საქართველოსა და ევროკავშირის მოქალაქეებს შორის განსაკუთრებით ღირებულია. ევროპის კომისია აფასებს იმ მნიშვნელოვან პროგრესს, რომელსაც საქართველომ სავიზო რეჟიმის ლიბერალიზაციის პროცესში მიაღწია და კიდევ ერთხელ გამოხატავს თავისი მხარდაჭერას ყველა იმ რეფორმის მიმართ, რომელიც ვიზალიბერალიზაციის სამოქმედო გეგმის შესრულების არეალში ხვდება. მათ შორის, ადამიანის უფლებებისა და პირადი მონაცემების უსაფრთხოების დაცვის გაუმჯობესების მიმართულებით. ევროპის კომისია მიესალმა საქართველოს მიერ ანტიდისკრიმინაციული კანონის მიღებას და ადასტურებს, რომ აგრძელებს საქართველოს მთავრობის მხარდაჭერას, რათა ქვეყანამ მაქსიმალურად სწრაფად მიაღწიოს პროგრესს ვიზალიბერალიზაციის პროცესში.
ევროკომისია მნიშვნელოვნად აფასებს იმ მასშტაბურ რეფორმებს, რომლებიც საქართველომ მართლმსაჯულების სფეროში გაატარა. ორივე მხარე ეთანხმება შემდგომი ნაბიჯების მნიშვნელობას სასამართლოს დამოუკიდებლობის განმტკიცებისა და სამართალდამცავი ორგანოების ანგარიშვალდებულების გაზრდისათვის.
ევროკომისია და საქართველოს მთავრობა ხაზგასმით აღნიშნავენ უმცირესობათა უფლებებისა და რელიგიური შემწყნარებლობის პრინციპებისადმი ერთგულებას. ევროკომისიის კოლეგია მიესალმება საქართველოს ხელისუფლების მიერ ანტიდისკრიმინაციული კანონის მიღებას და ადამიანის უფლებათა სტრატეგიისა და სამოქმედო გეგმის დამტკიცებას და კიდევ ერთხელ სთავაზობს საქართველოს სტრატეგიისა და გეგმის განხორციელებაში დახმარებას.
