27 თებერვალს ევროპულ და ევროატლანტიკურ სტრუქტურებში სახელმწიფო მინისტრის პირველმა მოადგილემ დავით დონდუამ მონაწილეობა მიიღო ნორვეგიის საერთაშორისო საქმეთა ინსტიტუტის მიერ ორგანიზებულ მრგვალ მაგიდაში - "საქართველოს საგარეო პოლიტიკის პრიორიტეტები."
მრგვალ მაგიდაში ინსტიტუტის მკვლევარები და მოწვეული სტუმრები მონაწილეობდნენ.
შესავალ სიტყვაში დავით დონდუამ ისაუბრა საქართველოს საგარეო პოლიტიკის ძირითად მიმართულებებეზე. მთავარი აქცენტი გაკეთდა ნატოსთან და ევროკავშირთან თანამშრომლობის მიმდინარე საკითხებზე, არსებულ ვითარებასა და სამომავლო გეგმებზე. დავით დონდუა, ასევე, ქვეყანაში მიმდინარე რეფორმები, უსაფრთხოების კუთხით რეგიონში არსებული მდგომარეობა და ქართულ-რუსული-ურთიერთობები მიმოიხილა.
გამოსვლის შემდეგ გაიმართა დისკუსია.
ინფორმაციისთვის: ნორვეგიის საერთაშორისო საქმეთა ინსტიტუტი 1959 წელს დაარსდა. ინსტიტუტი დამოუკიდებელი კვლევითი ცენტრია, რომლის ინტერესების ძირითად სფეროს წარმოადგენს საერთაშორისო პოლიტიკა, ეკონომიკური საკითხები, ენერგეტიკული უსაფრთხოება, კონფლიქტების პრევენცია, საერთაშორისო უსაფრთხოება და სხვა. ინსტიტუტი ამჟამად ახორციელებს პროექტს სამხრეთი კავკასიის ქვეყნების რამდენიმე უმაღლეს სასწავლებელთან ერთად, მათ შორის, თბილისის ივანე ჯავახიშვილის სახელობის სახელმწიფო უნივერსიტეტთან.