დღეს, 28 თებერვალს 17:00 საათზე, ბათუმში საერთაშორისო ინვესტორთა ასოციაციის ოფისში (ბაქოს ქ. #50) საქართველოს საერთაშორისო სავაჭრო პალატის (ICC Georgia) წარმომადგენლობა - ICC Ajara გაიხსნება. წარმომადგენლობის გახსნის ინიციატორი საერთაშორისო ინვესტორთა ასოციაციაა (IIA) და მის გახსნას საქართველოს საერთაშორისო სავაჭრო პალატის თავმჯდომარე ფადი ასლი დაესწრება. წარმომადგენლობის გასხნის ცერემონიაში მონაწილეობას მიიღებენ ასევე ასოციაციის წევრი-კომპანიები, აჭარის მთავრობისა და დიპლომატიური კორპუსის წარმომადგენელები.
ცნობილია, რომ ICC Ajara-ს წარმომაგენლობის დირექტორად ოსმან ჩაიშქანი დაინიშნება, რომელიც ამჟამდ საქართველოს საერთაშორისო სავაჭრო პალატის (ICC Georgia) სამეთვალყურეო საბჭოს წევრი და საერთაშორისო ინვესტორთა ასოციაციის გენრეალური მდივანია.
"მოხარული ვარ, რომ ისეთმა გავლენიანმა საერთაშორისო ბიზნესგაერთიანებამ, როგორიც არის ICC აჭარაში რეგიონალური წარმომადგენლობა ჩვენი ასოციაციის ქოლგის ქვეშ გახსნა. ეს ნიშნავს, იმას რომ ერთობლივი ძალებით ბიზნესის სხვადსხვა სეგმენტში, რეგიონში უფრო მეტ უცხოურ კაპიტალს მოვიზიდავთ." - განაცხადა საერთაშორიოს ინვესტორთა ასოციაციის პრეზიდენტმა ჯემალ ბილგინგულლუოღლუმ.
აღსანიშნავია, რომ საერთაშორისო ინვესტორთა ასოციაცია საქართველოს საერთაშორისო სავაჭრო პალატის (ICC Georgia) პრივილეგირებული პარტნიორი და დირექტორთა საბჭოს წევრი 2011 წლის ნოემბერში გახდა.
2009 წელს, ბათუმში საერთაშორისო ინვესტორთა ასოციაცია ექვსმა, უცხოური ინვესტიციებით შექმნილმა, კომპანიამ დააფუძნა. დღეს ასოციაცია 23 წევრ მეწარმე-სუბიექტს აერთიანებს. კომპანიები ძირითადად წარმოების სფეროში ოპერირებენ, მათ შორის ტექსტილი (ტანსაცმლის კერვა), სამშენებლო საქმე, სოფლის მეურნეობის გადამამუშავებელი მრეწველობა და ინდუსტრია. 2005 წლიდან დღემდე ასოციაციის წევრმა კომპანიებმა საქართველოში, ძირითადად, აჭარის რეგიონში 1 მილიარდი დოლარის ინვესტიცია განახორციელეს და 5000 ათასი ადამიანი დაასაქმეს.
საქართველოს საერთაშორისო სავაჭრო პალატის თავმჯდომარე ფადი ასლი; „„უაღრესად მნიშვნელოვანია საერთაშორისო ინვესტორთა ასოციაციის ოფისში, ბათუმში ICC Ajara-ს წარმომადგენლობის გახსნა. ეს ძალიან პოზიტიური და მნიშვნელოვანი ნაბიჯია ბიზნესის განვითარებისთვის, როგორც აჭარის რეგიონში ასევე მთლიანად ქვეყანაში. რადგან მჭიდრო თანამშრომლობის საფუძველზე შევძლებთ დავიცვათ ბიზნესის ინტერესები, გავაუმჯობესოთ რეგიონებში საინვესტიციო კლიმატი, გავაცნოთ საქართველოს მთავრობას ბიზნესის წარმომადგენლების ინტერესები და შეხედულებები, მათ შორის ხელი შევუწყოთ მუდმივ კომუნიკაციას. აჭარა მიმზიდველი ადგილია ინვესტორებისათვის მთელი მსოფლიოს მასშტაბით. საერთაშორისო სავაჭრო პალატა დაეხმარება ინვესტორებსა და ბიზნესმენებს სხვადასხვა მიმართულებით"
საქართველოს საერთაშორისო სავაჭრო პალატა არის ერთ-ერთი წარმატებული ორგანიზაცია სხვა გავლენიან ასოციაციებს შორის და ის ქვეყანაში 100-ზე მეტ ადგილობრივ მცირე, საშუალო და მსხვილ კომპანიებს აერთიანებს.
შეგახსენებთ, რომ საერთაშრისო სავაჭრო პალატა მსოფლიოში ყველაზე გავლენიან ბიზნეს ორგანიზაციას წარმოადგენს. იგი 130 ქვეყანაში არის წარმოდგენილი და აერთიანებს ასიათასობით წევრს. პალატა მჭიდროდ თანამშრობლობს საერთაშორისო სავაჭრო ორგანიზაციებთან, საერთაშრისო საბაჟო ორგანიზაციებთან, დიდ რვიანთან და გაეროსთან.
