საქართველოს სოციალურ-ეკონომიკური განვითარების სტრატეგიაში დასახული უმუშევრობის დაძლევის გზები მსოფლიო ბანკის ანგარიშში ასახულ პრობლემატიკას ეხმიანება
მიმდინარე წლის 27 თებერვალს, სასტუმროში „რედისონ ბლუ ივერია" მსოფლიო ბანკის ანგარიშის პრეზენტაცია თემაზე: „სამუშაო ადგილების რაოდენობის ზრდა ევროპისა და ცენტრალური აზიის რეგიონში" გაიმართა.
ღონისძიებას საქართველოს ფინანსთა და განათლებისა და მეცნიერების მინისტრები ნოდარ ხადური და თამარ სანიკიძე დაესწრნენ.
პრეზენტაცია წარმოადგინა ევროპისა და ცენტრალური აზიის რეგიონში მსოფლიო ბანკის სიღარიბის შემცირების და ეკონომიკური მართვის სექტორის მენეჯერმა და ანგარიშის ავტორმა კაროლინა სანჩეზ-პარამომ, რომელიც დაინტერესებულია საქართველოს სოციალურ-ეკონომიკური განვითარების სტრატეგიის „საქართველო 2020"-ის პროექტით, რომლის პრიორიტეტები უმთავრესად ეხმიანება მსოფლიო ბანკის მოხსენებაში ასახულ პრობლემატიკას.
„საქართველო 2020"-ის სტრატეგიაში ხაზგასმულია ეკონომიკური ზრდის უმნიშვნელო როლი გასული ათწლეულის მანძილზე დასაქმების თვალსაზრისით და გამოკვეთილია ის ღონისძიებები, რომლებიც აუცილებელია საქართველოში ახალი და პროდუქტიული სამუშაო ადგილების შესაქმნელად. კერძოდ, კერძო სექტორის კონკურენტუნარიანობა, შრომის ბაზარზე ორიენტირებული სამუშაო ძალის განვითარება და ფინანსებზე წვდომის გაძლიერება, რაც დასაქმების ზრდის აუცილებელ წინაპირობებს წარმოადგენენ.
მსოფლიო ბანკის მოხსენებაში ხაზგასმულია, რომ ევროპისა და ცენტრალური აზიის ზოგიერთ ქვეყანაში გასული ათწლეულის განმავლობაში მაღალი ეკონომიკური ზრდა სათანადოდ ვერ აისახა ახალი სამუშაო ადგილების შექმნაზე.
ანგარიშში აღნიშნულია, რომ ევროპისა და ცენტრალური აზიის ქვეყნების ხელისუფალთა ამოცანას წარმოადგენს ისეთი ეკონომიკური ზრდის მიღწევა, რომელიც ხელს შეუწყობს ახალი და უკეთესი სამუშაო ადგილების შექმნას. ანგარიშში ასევე მოცემულია რეკომენდაციები და ისინი ორ ძირითად სფეროს ეხება:
სამუშაო ადგილების შექმნისთვის საფუძვლის მომზადება ხელსაყრელი მაკროეკონომიკური და ბიზნეს გარემოს შექმნით, რომელიც არსებულ ფირმებს ზრდის შესაძლებლობას, ხოლო ახალ ფირმებს ჩამოყალიბების და წარმატების სწრაფად და ნაკლები დანახარჯებით მიღწევის საშუალებას მისცემს;
მუშახელისთვის ახალ სამუშაო ადგილებთან დაკავშირებული შესაძლებლობების გამოყენების საშუალების მიცემა, რათა მათ ჰქონდეთ სწორი უნარ-ჩვევები და სამუშაო სტიმული, შრომის ბაზარზე შეუფერხებელი წვდომა და ისეთ რეგიონებში გადასვლის საშუალება, სადაც ახალი სამუშაო ადგილების შექმნის უფრო დიდი პოტენციალია.
სამუშაო ადგილებთან დაკავშირებით არსებული ახალი შესაძლებლობებისთვის მუშა ხელის უკეთესად მოსამზადებლად ანგარიშის ავტორები ისეთი პოლიტიკის გატარებას უჭერენ მხარს, რომელიც ადამიანების მიერ თანამედროვე სამუშაო ადგილებზე საჭირო უნარ-ჩვევების შესწავლას გულისხმობს.
გარდა ამისა, უნდა მოხდეს იმ შემაფერხებელი გარემოებების და ბარიერების გაუქმება, რომლებიც ადამიანებს პროდუქტიულ დასაქმებაში უშლიან ხელს. ამაში, სხვა ფაქტორებთან ერთად, შიდა მიგრაციის შემაფერხებელი გარემოებების გაუქმება იგულისხმება.
