იუსტიციის მინისტრი თეა წულუკიანი საფრანგეთის სასამართლოს გადაწყვეტილებას თავდაცვის ყოფილ მინისტრთან დავით კეზერაშვილთან დაკავშირებით ეხმიანება და აღნიშნავს, რომ იგი დღეს თუ არა ხვალ იქნება ჩამობრძანებული ქვეყანაში, იმისთვის, რომ პასუხი გასცეს ქართულ საზოგადოებას.
წულუკინის განმარტებით, საფრანგეთის მოსამართლე უთანასწორო პირობების წინაშე აღმოჩნდა.
"ეს გადაწყვეტილება არის სულ ცინცხალი. გადაწყვეტილება ჯერ მე არ მინახავს გამოცემული არ არის ფრანგი მოსმართლის მოტივაცია რომ გავეცნო, მაგრამ ჩემთვის ცნობილია, ის რომ არის უარი. ძალიან ვწუხვარ, რომ ფრანგი მოსამართლე აღმოჩნდა ისეთი უთანასწორო პირობების წინაშე, როგორიც იყო, ერთი მხარეს კეზერაშვილის ძვირად ღირებული ადვოკატი და მეორე მხარეს, ფრანგი პროკურორი, რომელმაც ძვირადღირებულ ადვოკატს, როგორც ჩანს, ღირსეული და სათანადო კონკურენცია ვერ გაუწია იმისთვის, რომ ფრანგ პროკურორს ქართველი სამართალდამცავების სახელით ევალდებოდა, დაეცვა ჩვენი ინტერესი, ეს ასე ვერ მოხდა, მაგრამ ეს არ ნიშნავს, რომ ფრანგმა მოსამართლემ კეზარაშვილი რაიმეში გაამართლა. საქართველოში მის წინაშე წაყენებული ბრალი და ასეთადაც დარჩება. უბრალოდ, მე ვწუხვარ, რომ კეზერაშვილს არ მიეცემა საშუალება, ჩამოსულიყო და აქ გაებათილებინა მის წინააღმდეგ ქართველი პროკურორების მიერ წაყენებული ბრალდებები. ყოველშემთხვევაში, ამით ჩვენი სამუშაო ამოწურული არ არის. მე ვიცი, რომ პროკურატურა აგრძელებს და გააგრძელებს მუშაობას იმაზე, რომ დღეს თუ არა ხვალ ბატონი იქნას ჩამობრძანებული ქვეყანაში, იმისთვის, რომ პასუხი გასცეს ქართულ საზოგადოებას",- განაცხადა წულუკიანმა.
შეგახსენებთ, რომ საფრანგეთის ექს ან პროვანსის სასამართლომ საქართველოს თავდაცვის ყოფილი მინისტრის დავით კეზერაშვილის საქართველოში ექსტრადირებაზე უარი უთხრა.
დავით კეზერაშვილი საფრანგეთში, ქართული მხარის მოთხოვნით, 14 ოქტომბერს დააკავეს. საქართველოში დავით კეზერაშვილის წინააღმდეგ ორი სისხლის სამართლის საქმეა აღძრული, რომელთა განხილვა თბილისის საქალაქო სასამართლოში მიმდინარეობს. ერთი საქმე კონტრაბანდული სპირტის საქმეა, მეორე კი ტელეკომპანია "იმედის" და რიყის ტერიტორიის გასხვისების საქმე, სადაც თავდაცვის ყოფილი მინისტრი ბრალდებულია გიგი უგულავასთან ერთად.