კომერციული ბანკების საკრედიტო დაბანდების მოცულობა (არარეზიდენტებზე გაცემული სესხების ჩათვლით), 2014 წლის იანვარში, წინა თვესთან შედარებით, 0.2 პროცენტით, ანუ 18.6 მლნ ლარით შემცირდა და მიმდინარე წლის პირველი თებერვლისათვის 10.5 მლრდ ლარი შეადგინა. ამავე პერიოდში, ეროვნული ვალუტით გაცემული სესხების მოცულობა 52.3 მლნ ლარით (1.3 პროცენტით) გაიზარდა, ხოლო უცხოური ვალუტით გაცემული სესხების მოცულობა 71.0 მლნ ლარით (1.1 პროცენტით) შემცირდა.
რეზიდენტი იურიდიული პირებისათვის 2014 წლის იანვრის ბოლოს კომერციულ ბანკებს ეროვნული ვალუტით გაცემული ჰქონდათ 1.1 მლრდ ლარის (წინა თვესთან შედარებით 1.3 პროცენტით ანუ 13.8 მლნ ლარით ნაკლები), ხოლო უცხოური ვალუტით - 4.3 მლრდ ლარის (შესაბამისად, 0.7 პროცენტით ანუ 31.7 მლნ ლარით ნაკლები) მოცულობის სესხი.
იურიდიული პირების დაკრედიტების მთლიან მოცულობაში ყველაზე დიდი ხვედრითი წილი - 45.1 პროცენტი ვაჭრობის სფეროზე მოდის. 2013 წლის დეკემბერთან შედარებით, მიმდინარე წლის იანვარში ვაჭრობის სფეროზე გაცემული სესხების მოცულობა 0.9 პროცენტით ანუ 23.2 მლნ ლარით შემცირდა და პირველი თებერვლისათვის 2.4 მლრდ ლარი შეადგინა.
მრეწველობაზე გაცემული სესხების წილმა იურიდიულ პირებზე გაცემული ვადიანი სესხების საერთო მოცულობაში 17.4 პროცენტი შეადგინა, რაც 2014 წლის პირველი თებერვლისათვის 934.9 მლნ ლარით განისაზღვრა (0.8 პროცენტით ანუ 7.4 მლნ ლარით ნაკლები პირველი იანვრის მდგომარეობასთან შედარებით); 8.1 პროცენტი მოდის მშენებლობაზე, რაც 433.3 მლნ ლარია (0.5 პროცენტით, ანუ 2.3 მლნ ლარით ნაკლები, შესაბამისად). ამდენად, იურიდიული პირების დაკრედიტების საერთო მოცულობის 70.7 პროცენტი მხოლოდ სამ დარგზე - მრეწველობაზე, მშენებლობასა და ვაჭრობაზე მოდის.
2014 წლის იანვრის განმავლობაში 1.3 პროცენტით ანუ 59.1 მლნ ლარით გაიზარდა რეზიდენტი ფიზიკური პირების დაკრედიტების მოცულობა და მიმდინარე წლის პირველი თებერვლისათვის 4.8 მლრდ ლარს მიაღწია.