სახელმწიფომ ინვესტორებს 2014 წლის 1 იანვრამდე დაკისრებული/დასაკისრებელი პირგასამტეხლო აპატია. სახელელმწიფო ქონების ეროვნული სააგენტომ სახელმწიფო ქონების განკარგვის მიზნით დადებული ხელშეკრულებების კონტრაჰენტთა საყურადღებოდ დღეს სპეციალური განცხადებაც გაავრცელა.
"საქართველოს ეკონომიკისა და მდგრადი განვითარების სამინისტროსა და სსიპ „სახელელმწიფო ქონების ეროვნული სააგენტო"-ს ინიცირებით, „სახელმწიფო ქონების შესახებ საქართველოს კანონში" შესული ცვლილებებით (მუხლი 48.) სახელმწიფო ქონების შემძენ(ებ)ს და მართვის/სარგებლობის უფლებით მიმღებ პირებს ეპატია შესაბამისი ხელშეკრულებებით ნაკისრი ვალდებულებების შესრულების შესახებ ინფორმაციის წარდგენის ვალდებულების დარღვევის გამო 2014 წლის 1 იანვრამდე დაკისრებული/დასაკისრებელი პირგასამტეხლო, ხოლო სახელმწიფო ქონების უზუფრუქტუარს ეპატია ხელშეკრულებით ნაკისრი, გადაცემული ქონების დაზღვევის ან/და კომუნალური გადასახადების გადახდის ვალდებულების შეუსრულებლობის საფუძველზე 2014 წლის 1 იანვრამდე დაკისრებული/დასაკისრებელი პირგასამტეხლო. საყურადღებოა, რომ აღნიშნული პირგასამტეხლოს პატიება არ გულისხმობს ინფორმაციის წარდგენის თუ სარგებლობაში მიღებული ქონების დაუზღვევლობას ან/და კომუნალური გადასახადების გადახდის ვალდებულებისგან გათავისუფლებას.
აქვე აღსანიშნავია, რომ პირგასამტეხლოს პატიება ატარებს ერთჯერად ხასიათს. რაც გულისხმობს, რომ 2014 წლის 1 იანვრიდან ინფორმაციის წარდგენისა და ქონების დაზღვევის ან/და კომუნალური გადასახადების გადახდის ვალდებულების შეუსრულებლობის შემთხვევაში კონტრაჰენტებს დაეკისრებათ ხელშეკრულებით გათვალისწინებული პირგასამტეხლო.
ამასთან, ინფორმაციის პერიოდულად წარდგენის ხელშეკრულებით გათვალისწინებული ვადის ათვლა დაიწყება მათ მიერ ინფორმაციის წარმოდგენის შესაბამისი თარიღიდან. რაც იმას ნიშნავს, რომ მომდევნო ინფორმაცია წარმოდგენილი უნდა იქნეს კონტრაჰენტის მიერ ხელშეკრულებით ნაკისრი ვალდებულებების შესრულების შესახებ ბოლო ინფორმაციის წარმოდგენიდან შესაბამისი პერიოდის (მაგალითად, 6 თვე, ერთი წელი და სხვა) გასვლის დღემდე. ხოლო ის პირები, რომელთაც სსიპ - სახელმწიფო ქონების ეროვნული სააგენტოს მიერ წერილობით მოეთხოვებათ ინფორმაცია და მიეთითებათ კონკრეტული ვადა, ვალდებულნი არიან წერილში მითითებულ ვადაში უზრუნველყონ ინფორმაციის წარდგენა"- ნათქვამია განცხადებაში.
