28 თებერვალს, 17:00 საათზე, დიმიტრი შევარდნაძის სახელობის ეროვნულ გალერეაში გამოფენა სახელწოდებით „მექსიკის ხელოვნება: აღქმის მრავალფეროვნება" გაიხსნება.
ექსპოზიციაზე წარმოდგენილი იქნება მექსიკის ფინანსთა და სახალხო კრედიტის სამინისტროს (SHCP) კოლექციის ყველაზე აღიარებული და ცნობილი ხელოვანების 54 ნამუშევარი. ავტორთა შორის არიან დიეგო რივიერა, რუფინო ტამაიო, ფრანცისკო ტოლედო და სხვა.
ექსპოზიცია მოიცავს მექსიკის ხელოვნების XX და XI საუკუნეების ისეთ უმნიშვნელოვანეს მიმდინარეობებს, როგორიცაა ,,მექსიკის ხატვისა და ქანდაკების სკოლა", ნეომექსიკანიზმი და სხვ. გამოფენის მიზანია წარმოაჩინოს, თუ როგორ გამოდის საერთაშორისო ასპარეზზე თანამედროვე მექსიკური ხელოვნება თავისი განსაკუთრებული შემოქმედებითი გადაწყვეტებით.
გამოფენის ორგანიზატორები და მხარდამჭერები არიან: საქართველოს ეროვნული მუზეუმი, საქართველოს საგარეო საქმეთა სამინისტრო, მექსიკის საელჩო თურქეთში, მექსიკის საპატიო საკონსულო საქართველოში, საქართველოს კულტურისა და ძეგლთა დაცვის სამინისტრო, მექსიკის საერთაშორისო განვითარების თანამშრომლობის სააგენტო (AMEXCID), მექსიკის ფინანსთა და სახალხო კრედიტის სამინისტრო.
ექსპოზიცია გასტანს 2 მაისამდე.