ახლა როდესაც უკრაინაში ფართოვდება ქაოსი და ჯერ კიდევ ნარჩუნდება რუსული შეჭრის ალბათობა, სულ უფრო ცხადი ხდება, რომ დასავლეთის ვალია კონსტრუქციულ დარეგულირებას შეუწყოს ხელი. წერს The Financial Times-ში ცნობილი ამერკელი პოლიტოლოგი ზბიგნევ ბზეჟინსკი და აღნიშნავს, რომ რუსეთს ჯერ კიდევ შეუძლია უკრაინას სამოქალაქო ომისაკენ უბიძგოს - წააქეზოს და მხარი დაუჭიროს ყირიმისა და ზოგი აღმოსავლეთ რაიონის გამოყოფას.
„აუხსნას აშშ-მ პუტინს, რომ ის გამოიყენებს თავის გავლენას იმისათვის, რომ მართლაც დამოუკიდებელმა და ტერიტორიულად მთლიანმა უკრაინამ ფინეთის მსგავსი კურსი გაატაროს: ურთიერთპატივისცემაზე დამყარებული მეზობლობა რუსეთთან და ევროკავშირთან, ნებისმიერ სამხედრო ალიანსთან მიუერთებლობა, რომლებსაც მოსკოვი მის წინააღმდეგ მიმართულად მიიჩნევს, თან ამასთან ერთად ევროპაში ჩართულობის გარათოება",_ აცხადებს ზბიგნევ ბზეჟინსკი, თუმცა იქვე აღნიშმავს, რომ აშშ-მ მოსკოვთან არაოფიციალური საუბარიც უნდა გამართოს.
„მან უნდა აუხსნას კრემლს, რომ კიევის ახალგაზრდა დემოკრატიის დესტაბილიზების მცდელობები ან მცდელობები უკრაინის რომელიმე ნაწილის მოცილების შესახებ ან ღია ან ფარული მონაწილეობა შიდაკონფლიქტებში აიძულებენ ვაშინგტონს გამოიყენოს თავისი საერთაშორისო გავლენა და გადადგას ისეთი ნაბიჯები, რომლებიც მოსკოვს მსხვილ ეკონომიკურ დანაკარგებს მიაყენებს", _ მიიჩნევს პოლიტოლოგი.
მისვე თქმით, ევროკავშირი მყარი პარტნიორი უნდა იყოს, მან უკრაინისათვის ანტკრიზისული პარტნიორობის პაკეტი უნდა შეიმუშავოს.
ზბიგნევ ბზეჟინსკი ასევე ურჩევს ევროკავშირს დაარწმუნოს უკრაინელი ოლიგარქები დადონ თითო მილიარდი ქვეყნის ფინანსური რეაბილიტაციისათვის.
„იანუკოვიჩის ვაჟი ძალიან მდიდარი დანტისტია, ალბათ ის შეძლებს გარკვეული თანხის შეტანას",_ წერს ზბიგნევ ბზეჟინსკი, რომელიც დარწმუნებულია, რომ უკრაინა ადრე თუ გვიან შევა დემოკრატიულ ევროპაში, რუსეთი კი მის მაგალითს მიბაძავს იმ შემთხვევაში თუ ის „თვითიზოლირებას არ მოახდენს და იმპერიალიზმის ნახევრადგახრწნილ ნარჩენად არ იქცევა".
