„საქართველოს ახალგაზრდა კონსტიტუციონალისტთა ასოციაცია" 21 თებერვალს საქართველოს დემოკრატიული რესპუბლიკის პირველი კონსტიტუციის 93 წლის იუბილესთან დაკავშირებით ღონისძიებათა ციკლს გამართავს.
10:30 საათზე თბილისში, რუსთაველის გამზირზე, მოსწავლე ახალგაზრდობის სასახლესთან, სადაც მიღებულ იქნა საქართველოს დამოუკიდებლობის აქტი და ქვეყნის პირველი კონსტიტუცია, გაიმართება სამოქალაქო კამპანია. კამპანიის ფარგლებში ასოციაციის წევრები შეხვდებიან საქართველოს მოქალაქეებს, გაესაუბრებიან მათ 21 თებერვლის მნიშვნელობაზე და საჩუქრად გადასცემენ 1921 წლის კონსტიტუციებს.
აგრეთვე, 19:00 საათზე სასტუმრო „ვერე პალასში" (მის: ქუჩიშვილის ქ. 22-24, ფიქრის გორა) ასოციაციის ეგიდით გაიმართება ოფიციალური მიღება. ღონისძიებაზე დასახელდება ყოველწლიურ ნომინაციაში: „ქართული კონსტიტუციონალიზმის განვითარებაში შეტანილი განსაკუთრებული წვლილისთვის" გამარჯვებული, რომელსაც გადაეცემა „საქართველოს ახალგაზრდა კონსტიტუციონალისტთა ასოციაციის" სპეციალური პრიზი.
მიღებას დაესწრებიან კონსტიტუციონალისტები, სასამართლო, საკანონმდებლო და აღმასრულებელი ხელისუფლებისა და სამოქალაქო სექტორის წარმომადგენლები.
