საქართველოს საგარეო საქმეთა მინისტრმა მაია ფანჯიკიძემ და ევროკომისარმა ენერგეტიკის საკითხებში გიუნტერ ოტინგერმა დღეს ქართულ-გერმანული ბიზნეს-ფორუმი გახსნეს.
შეხვედრას ასევე ესწრებიან ქართველი და გერმანული კომპანიების წარმომადგენლები.
"ევროკომისარმა გიუნტერ ოტინგერმა საქართველოში 12 კაციანი დელეგაცია ჩამოიყვენა, რომელიც მსხვილი კომპანიების წარმომადგენლებისგანაა დაკომპლექტებული. დღეს მიმდინარეობს ფორუმი, რომელზეც უცხოელ ბიზნესმენებს საქართველოში არსებულ ვითარებას გააცნობენ და შემდეგ დაინტერესებულ კომპანიებთან კომუნიკაცია შედგება. ჩვენ ევროკომისართან ერთად მივესალმეთ ფორუმს, რის შემდეგაც ისინი სამუშაო ვითარებაში გააგრძელებენ შეხვედრას", - განაცხადა საგარეო საქმეთა მინისტრმა მაია ფანჯიკიძემ.
ცნობისთვის, შეხვედრას ბიზნესის წარმომადგენლებთან ერთად გერმანიის ეკონომიკური გაერთიანების, საპარტნიორო ფონდისა და საქართველოს თანაინვესტირების ფონდის წარმომადგენლები ესწრებიან.
