აშშ-ის საელჩოს მოწვევით, ამერიკელი პარაოლიმპიელი ქენდის ქეიბლი ერთკვირიანი ვიზიტით საქართველოში იმყოფება. ქეიბლი ხუთ საზაფხულო პარაოლიმპიურ თამაშებში ცხრა ოქროს მედალი და ზამთრის პარაოლიმპიურ თამაშებში სამი მედალი აქვს მოპოვებული. ის ცნობილი ათლეტი და შეზღუდული შესაძლებლობის პირთა უფლებების აქტიური დამცველია. მისი YouTube-ის ვიდეო-სერიები ათასობით შეზღუდული შესაძლებლობის პირს დაეხმარა, ეცხოვრათ უფრო აქტიური ცხოვრებით.
20 თებერვალს, 16:00 საათზე, ქეიბლი ელჩ რიჩარდ ნორლანდსა და სპორტისა და ახალგაზრდობის საქმეთა მინისტრ ლევან ყიფიანთან ერთად, ქართველ ახალგაზრდებს შეხვდება. ღონისძიებას საქართველოს სპორტისა და ახალგაზრდობის საქმეთა სამინისტროს ბავშვთა და ახალგაზრდობის განვითარების ფონდი უმასპინძლებს.
საქართველოში ვიზიტისას, ქალბატონი ქეიბლი შეხვდება ქართველ პარაოლიმპიელებს, არასამთავრობო ორგანიზაციებს, რომლებიც შეზღუდული შესაძლებლობების პირებს ეხმარებიან, უნივერსიტეტების სტუდენტებსა და გორში, ეროვნული თავდაცვის აკადემიის კადეტებს. საქართველოს შემდეგ ქალბატონი ქეიბლი მიემგზავრება სომხეთში, შემდეგ კი სოჭში, სადაც ის 2014 წლის პარაოლიმპიური თამაშებზე რეპორტიორად იმუშავებს.
საერთაშორისო პარაოლიმპიური კომიტეტის თანახმად, სიტყვა „პარაოლიმპიური" მოდის ბერძნული წინდებულისგან „პარა"(გვერდით ან გასწვრივ) და სიტყვა „ოლიმპიურისგან". „ეს ნიშნავს, რომ პარაოლიმპიადა ოლიმპიადის პარალელური თამაშებია და ამ ორი მოძრაობის თანაარსებობას გამოხატავს." პარაოლიმპიური თამაშები ოლიმპიური თამაშების დასრულებისთანავე, ოლიმპიადის მასპინძელ იმავე ქალაქში ტარდება.
