პარლამენტის ბიუროს დღევანდელ სხდომაზე, რომელსაც პარლამენტის თავმჯდომარე დავით უსუფაშვილი უძღვებოდა, საქართველოს პრეზიდენტის საქართველოს პარლამენტში გამოსვლის ფორმატზე შეჯერდნენ.
დავით უსუფაშვილის ინფორმაციით, საპარლამენტო უმრავლესობასა და საპარლამენტო უმცირესობას შორის დღეს გამართული საბოლოო კონსულტაციების შედეგად, დაადგინეს საქართველოს პრეზიდენტის გამოსვლის ფორმატი და პარლამენტის მოქმედი რეგლამენტის მოთხოვნებიდან გამომდინარე შეჯერდნენ სამუშაო გრაფიკზე.
საქართველოს პრეზიდენტის გამოსვლა 21 თებერვალს, 14:00 საათზე დაიწყება.
პრეზიდენტის გამოსვლის შემდეგ გამოცხადდება შესვენება, 16:00 საათზე კი სხდომა განახლდება ფრაქციების, საპარლამენტო უმრავლესობისა და უმცირესობის წარმომადგენელთა გამოსვლებით.
გარკვეული დრო განკუთვნილი იქნება ასევე პარლამენტის თავმჯდომარის გამოსვლისათვის. ამის შემდეგ კი საქართველოს პრეზიდენტი დასკვნითი სიტყვით გამოვა.
