6-8 ივლისს თბილისში ავიამიმართულებების განვითარების ფორუმი (Routes Silk Road) გაიმართება, რომელსაც ცენტრალური და აღმოსავლეთ ევროპის, ასევე ახლო აღმოსავლეთის, აზიისა და დსთ-ს ქვეყნების წარმომადგენლები დაესწრებიან. ღონისძიებას უმასპინძლებს და ორგანიზებას გაუწევს შპს „საქართველოს გაერთიანებული აეროპორტები."
„Routes Silk Road" თბილისში პირველად ტარდება და მას 250 დელეგატი დაესწრება. ფორუმის მიზანი აეროპორტების, ავიაკომპანიების, ტურიზმის სფეროში მომუშავე ორგანიზაციებისა და სხვა დაინტერესებულ პირებისთვის საქმიანობის წარმოებისა და საჰაერო ტრანსპორტირების ქსელების გაუმჯობესების ხელშეწყობა და მათთვის საუკეთესო პლატფორმის შეთავაზებაა. „Routes" ორგანიზებას უწევს მსოფლიოს მასშტაბით ცნობილი ავიაკომპანიებისა და აეროპორტების ქსელის ღონისძიებებს მისი რეგიონალური და გლობალური „ავიამიმართულებების განვითარების ფორუმების" საშუალებით. ყოველწლიურად ტარდება ერთი გლობალური ღონისძიება და ერთი რეგიონალური ღონისძიება აზიაში, აფრიკაში, ევროპაში, ამერიკასა . იგი ითვლება მსოფლიოს მასშტაბით ერთ-ერთ ყველაზე პრესტიჟულ ფორუმად.
„ჩვენ ერთსულოვნად მივიღეთ გადაწყვეტილება „Routes Silk Road"-ის საქართველოში ჩატარების შესახებ. საქართველო წარმოადგენს რამდენიმე მნიშვნელოვანი ეკონომიკური რეგიონის დამაკავშირებელ კარიბჭეს და აღნიშნულიდან გამომდინარე მას გააჩნია იდეალური ადგილ-მდებარეობა „Routes Silk Road"-სა და ნებისმიერი მხარისთვის, რომელიც ცდილობს დაუკავშირდეს უფრო ფართომასშტაბიან ავიაკომპანიებისა და აეროპორტების საზოგადოებებს" - აცხადებს UBM Live-ის (გლობალური ღონისძიებების ორგანიზატორი კომპანია) ტრანსპორტისა და ტექნოლოგიების ჯგუფის დირექტორი ედრიენ ნიუტონი.
„საქართველოს აეროპორტების გაერთიანების" ინფორმაციით, ბოლო წლებში საქართველომ განიცადა უპრეცედენტო წინსვლა საჰაერო ტრანსპორტის, მგზავრებისა და ტურისტების რაოდენობის ზრდის მხრივ. „ ჩვენ შევიმუშავეთ რამდენიმე მნიშვნელოვანი ინფრასტრუქტურული პროექტი და ბევრი რამ გვაქვს საჩვენებელი საავიაციო მრეწველობის საერთაშორისო საზოგადოებისთვის" - აღნიშნავს „საქართველოს აეროპორტების გაერთიანების" აღმასრულებელი დირექტორი ქეთევან ალექსიძე. მისივე თქმით, ფორუმი კარგ შესაძლებლობას იძლევა გლობალურ საავიაციო საზოგადოებაში ცნობიერების დონის ასამაღლებლად და მოხდება ქვეყნის, როგორც მნიშვნელოვანი გეოგრაფიული ადგილმდებარეობის პრომოცია.
ცნობისთვის: შპს „საქართველოს აეროპორტების გაერთიანებას" ეკუთვნის საქართველოს ოთხივე აეროპორტი, რომელთა შორის სამი საერთაშორისო აეროპორტს წარმოადგენს. ყველა აეროპორტის ტერმინალი სრულად რეკონსტრუირებული და მოდერნიზებულია. 2012 წლიდან საქართველოს აეროპორტებში მგზავრების რაოდენობის მნიშვნელოვანი ზრდა (30%-ზე მეტით) აღინიშნა.
