გიგი უგულავა კვიპროსის დედაქალაქ ნიქოზიაში ევროსაბჭოს ადგილობრივ და რეგიონალურ ხელისუფლებათა კონგრესის მონიტორინგის კომიტეტის შეხვედრას დაესწრო. შეხვედრის დღის წესრიგში საქართველოში ადგილობრივი თვითმმართველობის თვალსაზრისით შექმნილი სიტუაცია ცაკლე საკითხად იყო შეტანილი.
გიგი უგულავამ, როგორც აღნიშნული კომიტეტის წევრმა, აღნიშნა, რომ სამწუხაროდ, ადგილობრივი თვითმმართველობის ახალი კოდექსი არ არის სრულყოფილი და იგი არ ემსახურება ადგილობრივი თვითმმართველობის სფეროში არსებული მდგომარეობის გაუმჯობესებას და პრობლემების გადაწყვეტას.
გიგი უგულავამ ხაზი გაუსვა იმ ფაქტს, რომ მიუხედავად იმისა, რომ არჩევნებამდე რამოდენიმე თვეა დარჩენილი, საარჩევნო კოდექსი ჯერ კიდევ არ არის მიღებული, რაც წინასაარჩევნოდ მრავალ შეკითხვას ბადებს.
"მიუხედავად საქართველოს მთავრობის ჯიუტი მტკიცებისა, რომ პოლიტიკურად მოტივირებულ დაჭერებთან და პოლიტიკურ დევნასთან დაკავშირებით, საერთაშორისო ფორუმებზე არ ისმება შეკითხვები, ფაქტები სხვა რამეზე
მეტყველებს. არ არსებობს შეკრება და თემა, რომელიც საქართველოს ეხება და ის არ უკავშირდებოდეს პოლიტიკურად მოტივირებული ოპოზიციის დევნას და დაჭერებს. როდესაც ჩვენ ვლაპარაკობთ თვითმმართველობებზე და მონოტორინგის კომისია სწორედ თვითმმართველობის საკითხებს იხილავდა, სწორედ მთავარი თემა ეს იყო, რომ ერთია კანონი, რომელსაც ვიღებთ და ამ თვალსაზრისითაც კანონის სრული კასტრაცია მოხდა და რეალურად ჩვენ ფასადური ცვლილებები მივიღეთ თვითმმართველობაში, მაგრამ მთავარია არა მარტო კანონი, არამედ მისი აღსრულება. ბუნებრივია აქ ყველას ესმის, რომ როდესაც კანდიდატებს აპატიმრებენ არჩვენებამდე 3 თვით ადრე არანაირ თავისუფალ არჩევნებზე და კონკურენციაზე საუბარი არ არის. ამიტომ აქ გადაწყვეტილებაა მიღებული, რომ
რაც შეიძლება მჭიდრო იყოს მონიტორინგი წინა საარჩევნო პერიოდში და დარწმუნებული ვარ მხოლოდ საერთაშორისო ძალისხმევით შესაძლებელი იქნება, რომ ეს თავხედობა რომელსაც დღეს მთავრობა მიმართავს შეჩერებული იყოს", - განაცხადა უგულავამ.
როგორც კომიტეტის წევრებმა აღნიშნეს, ისინი ყურადღებით მიადევნებენ თვალს საქართველოში ადგილობრივი თვითმმართველობის სფეროში არსებულ სიტუაციას და დამატებით მონიტორინგის შემდგომი მისიის გამოგზავნის საკითხს განიხილავენ.
