სოჭში მყოფმა უკრაინის დელეგაციამ საერთაშორისო ოლიმპიურ კომიტეტს მიმართა თხოვნით, უკრაინელ სპორტსმენებს გუშინ კიევში მომხდარ ტრაგიკულ ამბებთან დაკავშირებით გლოვის ნიშნად შავი სამკლაურები გაეკეთებინათ.
თუმცა, საერთაშორისო ოლიმპიურმა კომიტეტმა უკრაინის ნაკრებს ამ თხოვნის შესრულებაზე უარი განუცხადა და ეს შეუძლებლად ჩათვალა.
ადრე მსგავს მიმართვებზე უარი ეთქვათ ნორვეგიისა და კანადის გუნდებს, რომლებმაც ოლიმპიურ კომიტეტს თავიანთ თანამემამულეებთან დაკავშირებული ტრაგიკული მოვლენების გამო მიმართეს.
შეგახსენებთ, რომ 18 თებერვალს კიევის ცენტრში მაიდანის აქტივისტებსა და სამართალდამცავებს შორის დაპირისპირებამ ახალი ძალის იფეთქა. მსხვერპლმა 25 ადამიანს მიაღწია.
