სახელმწიფო მინისტრი ევროინტეგრაციის საკითხებში ალექსი პეტრიაშვილი მიიჩნევს, რომ უკრაინის ხელისუფლებამ ოპოზიციასთან საერთო გზა და ენა უნდა მონახოს სიტუაციის დეესკალაციისათვის. როგორც საკითხის კომენტირებისას პეტრიაშვილმა ჟურნალისტებთან განაცხადა უკრაინაში ძალადობა უნდა შეწყდეს.
"ვგმობ ყოველგვარ ძალადობას, ვუერთდები საერთაშორისო დემოკრატიული თანამეგობრობის მოწოდებას უკრაინის ხელისუფლებისადმი, რომ მონახოს საერთო გზა და ენა ოპოზიციასთან სიტუაციის დეესკალაციისათვის. ვიმედოვნებ, უკრაინა უახლოეს მომავალში შეძლებს განაგრძოს გზა ევროპაში ინტეგრაციისაკენ. პირველ რიგში, უნდა შეწყდეს ცეცხლი. ევროპამ, ამერიკამ, საერთაშორისო თანამეგობრობამ ძალიან პრინციპული პოზიციები დააფიქსირა და მზადყოფნას გამოთქვამს შემდგომში შუამავლად ჩართვისთვისაც და ეს მნიშვნელოვანია, ვინაიდან, საუბარია უკვე სანქციებზე. აუცილებლად უნდა შეწყდეს ძალადობა და მხარეები მიუსხდნენ მოლაპარაკების მაგიდას, - განაცხადა პეტრიაშვილმა.
