დღეს, საჯარო რეესტრის ეროვნული სააგენტოს თავმჯდომარემ პაპუნა უგრეხელიძე და სერვისების განვითარების სააგენტოს თავმჯდომარის მოადგილე მამუკა სამხარაძე თბილისის მისამართების კორექტირების საველე სამუშაოებს ადგილზე გაეცნენ.
ამ ეტაპზე დიდუბე-ჩუღურეთის რაიონში მისამართების კორექტირებისთვის საველე სამუშაოებს საჯარო რეესტრის მობილური ჯგუფები ასრულებენ. ამჟამად ისეთი ტიპის მისამართები სწორდება, რომლებსაც ნომრის ნაცვლად უწერიათ „მიმდებარედ" „შორის", „გასწვრივ", „მოპირდაპირედ" და ა. შ. ასეთი ტიპის მისამართების რაოდენობა ქ. თბილისში 15 000-მდეა.
მოქალაქეებს მისამართის შესწორების შესახებ გადაწყვეტილებას საჯარო რეესტრის თანამშრომლები უშუალოდ, სახლში მიუტანენ. დამისამართების პროექტის ფარგლებში საჯარო რეესტრისა და სერვისების განვითარების სააგენტოების ბაზებში ასახული ცვლილებების მიუხედავად, მოქალაქეებს დოკუმენტაციის ხელახლა აღება არ მოუწევთ, რადგან საკუთრებისა და მოქალაქეების შესახებ ბაზებში შენახული იქნება როგორც ძველი ინფორმაცია, ასევე კორექტირებული მონაცემებიც.
როგორც საჯარო რეესტრის თავმჯდომარემ პაპუნა უგრეხელიძემ ფოთის ქუჩის მაცხოვრებლებთან შეხვედრაზე აღნიშნა „დამისამართების პროექტის ფარგლებში საჯარო რეესტრი აგრძელებს საველე სამუშაოებს. პროექტი ითვალისწინებს სამისამართო სისტემის განვითარებას და მოსახლეობის რეესტრის ერთიანი ბაზის გაუმჯობესებას. მოგეხსენებათ, არარსებული, გამოტოვებული ან გამეორებული მისამართები გაუგებრობის და დავის საგანი არაერთხელ გამხდარა. მსგავსი ფაქტები მოქალაქეებს ქონების რეგისტრაცის, პირადობის მოწმობის აღების, კომუნალური გადასახადების გადახდის, საფოსტო გზავნილის მიღებისას ხშირად უქმნის პრობლემებს. დამისამართების პროექტის ფარგლებში საჯარო რეესტრი აგრძელებს საველე სამუშაოებს, რომლის შედეგად, საქართველოს დასახლებულ პუნქტებში უსახელო გზები და უნომრო ქუჩები აღარ იქნება. შესაბამისად, მოგვარდება მისამართებთან დაკავშირებული ყველა ის პრობლემა, რომელიც მოსახლეობას მრავალი წელია აწუხებს".
მას შემდეგ, რაც საჯარო რეესტრის ეროვნული სააგენტო ქუჩების, მათზე არსებულ შენობა-ნაგებობებისა და ბინების დანომვრას დაამთავრებს, სერვისების განვითარების სააგენტო ახალ მისამართებზე არსებულ საცხოვრებლებში რეგისტრირებულ პირთა იდენტიფიცირებას მოახდენს. დამისამართების ერთიანი სისტემის შექმნა მჭიდრო კავშირშია დაზუსტებული, მუდმივად განახლებადი, საიმედო საარჩევნო სიის ფორმირებასთან.
საჯარო რეესტრმა არასწორი, არასრული და ნუმერაციის არმქონე მისამართების კორექტირება ვაკის, საბურთალოს, გლდანის, ჩუღურეთის რაიონებში უკვე დაასრულა. კორექტირებული მისამართების რაოდენობა ამ ეტაპზე 8 300 ერთეულს შეადგენს.
ქ. თბილისში მსგავსი არასწორი მისამართების კორექტირება 2014 წლის ბოლოს დასრულდება.