სასტუმროების ქსელ "მარიოტის" წარმომადგენლებმა, რომელიც საქართველოში ბიზნესის გაფართოებით არიან დაინტერესებულნი თბილისის, ქუთაისისა და ბათუმის საინვესტიციო შესაძლებლობები ადგილზე მოინახულეს. "მარიოტს" საქართველოში ახალი ბრენდის MOXY-ს შემოყვანა სურს და პროექტების განსახორციელებლად შესაბამის ადგილებსაც არჩევს.
"მარიოტის" წარმომადგენლებმა უკვე დაათვალიერეს თბილისის, ქუთაისისა და ბათუმის შესაძლებლობები. ძალიან დადებითი შთაბეჭდილება დარჩათ სამივე ქალაქთან მიმართებაში. MOXY, რომელიც მათი ახალი ბრენდია, სწორედ ამ ბრენდით არის შესაძლებლობა ჩვენს ქვეყანაში შემოსვლის და ქსელურად რამდენიმე სასტუმროს აშენების. მათ ყავთ თავიანთი ინვესტორები. როგორც იცით, „მარიოტი" არის ოპერატორი და მათთან ერთად არის თავიანთი ინვესტორი"- აღნიშნა ეკონომიკისა და მდგრადი განვითარების მინისტრის პირველმა მოადგილემ დიმიტრი ქუმსიშვილმა.
როგორც ცნობილია, "მარიოტი" MOXY-თვის „ბათუმი თაუერსაც" განიხილავს, თუმცა. როგორც დიმიტრი ქუმსიშვილი განმარტავს, ინვესტორს ამ ეტაპისთვის ჯერ საბოლოო გადაწყვეტილება არ მიუღია. მინისტრის მოადგილის განმარტებით, „ბათუმი თაუერის" გასხვისებაზე ეკონომიკისა და მდგრადი განვითარების სამინისტრო „მარიოტის" გარდა სხვა კომპანიებთანაც აწარმოებს მოლაპარაკებებს.
„4 ინვესტორთან ვსაუბრობთ. ოთხივე ძალიან სერიოზული კომპანიებია. ჩვენ აქტიურად ვმუშაობთ. თავად პროექტები არის დიდი და ინვესტორებიც ასე იოლად გადაწყვეტილებას ვერ იღებენ. ინვესტორებს სჭირდებათ სპეციალური საინჟინრო ჯგუფების ჩამოყვანა და შესწავლა, შესაძლებლობების გარკვევა. როდესაც ინვესტორთან ურთიერთობას ვიწყებთ, მათი პირველი ზარიდან თუ შეხვედრიდან, იქამდე რომ ამ ადამიანებმა ქვეყანაში ფულის ჩადების გადაწყვეტილება მიიღონ, ამას სჭირდება გარკვეული პერიოდი. ხშირად ეს პერიოდი არის 6 თვეც და ეს ნორმალურია. შესაძლებლობების შესწავლას, ეს იმას ნიშნავს, რომ ცოცხალი ადამიანები ზიან და აკეთებენ ბიზნესგეგმებს, ნახულობენ არქიტექტურასა და აკვირდებიან მის შესაძლებლობებს. ნახულობებ ბაზრებს, როგორც ქვეყნის შიგნით ასევე ქვეყნის გარეთ. აკვირდებიან კანონმდებლობას და სხვა"- განაცხადა ქუმსიშვილმა.
შეგახსენებთ, რომ 12 თებერვალს, ეკონომიკისა და მდგრადი განვითარების მინისტრმა გიორგი კვირიკაშვილმა შეხვედრა გამართა „მარიოტის" წარმომადგენლებთან, რომლებიც საქართველოში ახალი, "მოქსის" (MOXY) ბრენდის შემოსვლით არიან დაინტერესებული. "მოქსი" წარმოადგენს „მარიოტის" ჯგუფის ბრენდს, რომელიც თავისი ხარისხით, სერვისით და ხელმისაწვდომობით ევროპაში დიდი პოპულარობით სარგებლობს.
"საქართველოს დიდი შესაძლებლობები აქვს. გვიხარია, რომ ეკონომიკის სამინისტროს მხრიდან ძლიერი მხარდაჭერა გვაქვს. საქართველოს ბაზარს ვიკვლევთ. ძალიან კარგი საფუძველი არსებობს აქ იმისთვის, რომ მომდევნო წლებში საქართველოს ბაზარზე რეალიზება მოვახდინოთ. ეს იქნება პირველი საერთაშორისო მცდელობა იმისა, რომ ,,მოქსი" ბრენდი აღმოსავლეთ ევროპის ბაზარზე გავაფართოვოთ. ჩვენ აქ ძალიან კარგი პარტნიორები გვყავს" - განაცხადა გიორგი კვირიკაშვილთან გამართული შეხვედრის შემდგომ „მარიოტის" სასტუმროების საერთაშორისო განვითარების ვიცე-პრეზიდენტმა მარკუს ლენერტმა.
პროექტის განხორციელების შემთხვევაში, საქართველო აღმოსავლეთ ევროპაში პირველი ქვეყანა იქნება, სადაც "მოქსის" ბრენდის სასტუმრო აშენდება.
"ამ დროისთვის საქართველოში, კერძოდ თბილისში ორი სასტუმროთი ვართ წარმოდგენილი. გვიხარია, რომ თქვენს ქვეყანაში წარმატებით ვმოღვაწეობთ. კმაყოფილები ვართ ქართველი პარტნიორებით და მათი მუშაობით. ჩამოვედით, რათა ადგილზე შევისწავლოთ ბაზარი და ვნახოთ რამდენად შეესაბამება ახალი ბრენდი ბაზრის მოთხოვნებს»- აღნიშნა "მარიოტის" ქსელის აღმოსავლეთ ევროპის ვიცე-პრეზიდენტმა ივიცა ჩაჩიციმ.
