ხვალ, 10 თებერვალს 18:00 საათზე საქართველოს პარლამენტის ეროვნული ბიბლიოთეკის საკონფერენციო დარბაზში ივანე ჯავახიშვილის სახელობის თბილისის სახელმწიფო უნივერსიტეტის არნოლდ ჩიქობავას სახელობის ენათმეცნიერების ინსტიტუტის პროექტის "საქართველოს ლინგვისტური პორტრეტის" ფარგლებში მომზადებული ქართული დიალექტური კორპუსის წარდგენა და გაცნობა გაიმართება. პროექტი ეროვნული ბიბლიოთეკის მხარდაჭერით ხორციელდება.
2014 წლის განმავლობაში დაგეგმილია შეხვედრების სერია, რომლის მიზანია, საზოგადოების სხვადასხვა ჯგუფისათვის კორპუსის, როგორც ქართული ენობრივი მასალის მომცველი მასშტაბური ენათმეცნიერული და კულტურული პროდუქტის პოპულარიზაცია.
შეხვედრებზე ნაჩვენები იქნება ექსპედიციების დროს ჩაწერილი უნიკალური ტექსტები, აუდიო და ვიდეო მასალები, კორპუსის შემადგენლობის, მისი მნიშვნელობის გაცნობა. შეხვედრების სერია პერმანენტულად გაიმართება მეცნიერების, კულტურის მოღვაწეების, სტუდენტების თუ დაინტერესებული საზოგადოებისათვის.
„ქართული დიალექტური კორპუსი" არის თანამედროვე ტექნოლოგიებზე დაყრდნობით აგებული საინფორმაციო-საცნობარო სისტემა, რომლის საშუალებითაც შესაძლებელია ქართული ენის ნებისმიერი ქვესისტემის ან სხვა ქართველური ენების მონაცემების შენახვა, აღწერა, კვლევა. მეტიც, კორპუსის მოდელი შეიძლება გამოყენებული იყოს ნებისმიერი მულტილინგვისტური ენობრივი არეალის აღსაწერად.
დღეისათვის კორპუსში 1 453 325 სიტყვაა. ტექსტური მასივის შევსება გრძელდება. შინაარსობრივი თვალსაზრისით კორპუსი მოიცავს სხვადასხვა დანიშნულების ავთენტურ ტექსტებს. მომხმარებელი აქ იპოვის ადამიანებს, ისტორიებს, კულტურულ რეალიებს, მიგრაციების მარშრუტებსა და შედეგებს, ტოპონიმებს, საკუთარ სახელებს, ისტორიულ პიროვნებათა შესახებ მოგონებებს, კულინარიულ რეცეპტებს, ფოლკლორულ ვარიაციებს, ხალხური დიპლომატიისა და ერთა შორის ურთიერთობის შესახებ ცნობებს.
მასალის გამოყენების პირობები
