თბილისის 2014 წლის ბიუჯეტის პროექტთან დაკავშირებით თბილისის მერია კიდევ ერთ განცხადებას ავრცელებს. განცხადებაში აღნიშნულია, რომ ბიუჯეტის პროექტთან დაკავშირებით საკრებულოს სხვადასხვა კომისიებისა და ცალკეული დეპუტატებისგან გამოითქვა მოსაზრებები თუ რა ცვლილება უნდა განიცადოს წარდგენილმა პროექტმა, იმისათვის რომ საკრებულოს უმრავლესობამ მხარი დაუჭიროს თბილისის ბიუჯეტის დამტკიცებას.
„თბილისის მერია მზად არის გაითვალისწინოს ყველა გონივრული შენიშვნა, იმისათვის რომ დროულად მოხდეს ბიუჯეტის დამტკიცება და მოიხსნას ის საფრთხეები, რაც თბილისელებს ამ პერიოდში შეექმნათ. ამისათვის მნიშვნელოვანია, რომ საკრებულოს უმრავლესობამ დროულად წერილობით წარუდგინოს თბილისის მერიას მათი წინადადებები.
იქიდან გამომდინარე, რომ საკრებულოს სხდომა საკრებულოს თავმჯდომარის გადაწყვეტილებით დაინიშნა 12 თებერვალს, თბილისის მერია მზადყოფნას გამოთქვამს ოფიციალურად იმუშაოს შაბათს და კვირას, გამართოს შეხვედრები, მიიღოს და განიხილოს საკრებულოს წერილობითი წინადადებები, რომ ხელოვნურად არ გაჭიანურდეს საბიუჯეტო პროცესი და თბილისის ბიუჯეტის სრულყოფილად განხილვა შედგეს 12 თებერვალს.
იმედი გვაქვს საკრებულოს უმრავლესობა დროულად წარმოადგენს წერილობით დოკუმენტს მათი შენიშვნების შესახებ და აღნიშნული არ გახდება ბიუჯეტის დამტკიცების გადადების მიზეზი"- ნათქვამია განცხადებაში.
