საქართველოში კიდევ ერთი ფეროშენადნობი ქარხნის მშენებლობა იგეგმება. საწარმოს მშენებლობისთვის საქართველოს მთავრობამ კომპანია „ჯი თი ემ გრუპს" ზესტაფონში შესაბამისი მიწის ნაკვეთი, პირდაპირი მიყიდვის წესით უკვე გადასცა.
საქართველოს მთავრობის № 130 განკარგულებით ირკვევა, რომ სახელმწიფო საკუთრებაში არსებული, ზესტაფონის მუნიციპალიტეტში, სოფელ არგვეთაში მდებარე 14068 კვ.მ არასასოფლო-სამეურნეო დანიშნულების მიწის ნაკვეთი და ასევე იმავე სოფელში განთავსებული 13351 კვ.მ არასასოფლო-სამეურნეო დანიშნულების მიწის ნაკვეთი, შპს „ჯი თი ემ გრუპს" პირდაპირი მიყიდვის ფორმით, 110 ათას ლარად საკუთრებაში გადაეცემა.
საპრივატიზაციო პირობების მიხედვით, კომპანიამ გადაცემულ ქონებაზე ფეროშენადნობი ქარხნის მშენებლობა უნდა განახორციელოს. პირობების მიხედვითვე, „ჯი თი ემ გრუპს" საწარმოს დასრულება და ექსპლუატაციაში მიღება, შესაბამისი ხელშეკრულების გაფორმებიდან 3 წლის ვადაში დაევალა. როგორც მთავრობის განკარგულებიდან ირკვევა, ინვესტორს საპრივატიზებო პირობის შესრულების მიზნით მინიმუმ 4 მილიონი აშშ დოლარის ინვესტიციის განხორციელება დაეკისრა.