კოდეინის, ეფედრინის, ფსევდოეფედრინისა და ნორეფედრინის შემცველი კომბინირებული საშუალებების ლეგალური ბრუნვის დადგენილი წესების დარღვევისთვის სისხლის სამართლებრივი პასუხისმგებლობა განისაზღვრება.
საქართველოს კანონის პროექტი, რომელიც „ნარკოტიკული საშუალებების, ფსიქოტროპული ნივთიერებების, პრეკურსორებისა და ნარკოლოგიური დახმარების შესახებ" საქართველოს კანონში ცვლილების შეტანას ითვალისწინებს, ჯანმრთელობის დაცვისა და სოციალურ საკითხთა კომიტეტს შინაგან საქმეთა მინისტრის მოადგილემ, ლევან იზორიამ წარუდგინა. კანონს, ნარკოტიკული საშუალებების, ფსიქოტროპული ნივთიერებებისა და პრეკურსორების კვოტებთან ერთად, დაემატება ქვეყნის შიდა კვოტა, რომელიც განსაზღვრულია, როგორც სპეციალურ კონტროლს დაქვემდებარებულ ცალკეულ ნივთიერებებზე და მათთან გათანაბრებულ სამკურნალო საშუალებებზე ქვეყნის წლიური მოთხოვნილების გათვალისწინებული ლიმიტი. ლევან იზორიას თქმით, კუსტარულად დამზადებული ნარკოტიკული საშუალებების მოხმარების პრევენცია კომპლექსური ღონისძიებების გატარებას მოითხოვს. მისი თქმით, ე.წ. სააფთიაქო ნარკომანიის წინააღმდეგ ბრძოლაში შინაგან საქმეთა სამინისტროსთან ერთად, შრომის, ჯანმრთელობისა და სოციალური დაცვისა და განათლებისა და მეცნიერების სამინისტროებიც ჩაერთვებიან. ჯანმრთელობის დაცვისა და სოციალურ საკითხთა კომიტეტმა კანონში ცვლილების შეტანას მხარი ერთხმად დაუჭირეს.
