კუსტარული ნარკოტიკული საშუალებების დასამზადებელი მედიკამენტების გაყიდვაზე კონტროლი მკაცრდება. აღნიშნულიდან გამომდინარე, ცვლილებები შედის „ნარკოტიკული საშუალებების, ფსიქოტროპული ნივთიერებების, პრეკურსორებისა და ნარკოლოგიური დახმარების შესახებ" საქართველოს კანონში.
კანონპროექტი იურიდიულ საკითხთა კომიტეტის წევრებს შინაგან საქმეთა მინისტრის მოადგილემ, ლევან იზორიამ წარუდგინა. მომხსენებელმა კუსტარულად დამზადებული ნარკოტიკების მოხმარებით ქვეყანაში არსებული პრობლემები მიმოიხილა და მისი გადაჭრის გზებზეც ისაუბრა. ლევან იზორიას ინფორმაციით, ე.წ. კლასიკური ნარკოტიკები კუსტარულად დამზადებულმა ნარკოტიკებმა: „კრაკადილმა", „ვინტმა" და „ჯეფიმ" ჩაანაცვლა, რასაც მომხმარებლებისთვის უფრო მეტი ფიზიკური და ფსიქიკური ზიანი მოაქვს. მათ მოსამზადებლად საჭირო უმთავრესი ქიმიური ნივთიერებების - კოდეინის, ეფედრინის, ფსევდოეფედრინისა და ნორეფედრინის შემცველი კომბინირებული საშუალებების სახით შეძენა კი სააფთიაქო ქსელში ურეცეპტოდაც შესაძლებელია. მინისტრის მოადგილის განცხადებით, მიუხედავად იმისა, რომ გასულ წელს აღნიშნული ნივთიერებების ურეცეპტოდ გაყიდვაზე ადმინისტრაციული ჯარიმა გაიზარდა და მისი ოდენობა 6000 ლარით განისაზღვრა, აფთიაქები გაყიდვას მაინც განაგრძობენ, რადგან მათი რეალიზებით მიღებული მოგება გაცილებით დიდია. მისივე ინფორმაციით, წარმოდგენილი კანონპროექტით გამკაცრდება კონტროლი იმ ფსიქოტროპულ წამლებზე, რომლითაც კუსტარულად მზადდება ნარკოტიკული საშუალებები.
„ცვლილების შედეგად ფარმაცევტულ პროდუქტზე გავრცელდება კონტროლის ის რეჟიმები, როგორიც დადგენილია I ჯგუფისთვის მიკუთვნებულ სხვა სამკურნალო საშუალებებზე. ამასთან ერთად, ადმინისტრაციულ ჯარიმას სისხლის სამართლებრივი პასუხისმგებლობა ჩაანაცვლებს და დანაშაულის გამოვლენის შემთხვევაში რამდენიმე წლით მოხდება როგორც სააფთიაქო, ისე საექიმო ლიცენზიის ჩამორთმევა", - აღნიშნა ლევან იზორიამ. საკითხის მნიშვნელობიდან გამომდინარე, კომიტეტის სხდომაზე დისკუსია გაიმართა. კომიტეტის წევრებმა გარდა იმისა, რომ მხარი დაუჭირეს წარმოდგენილ კანონპროექტს, სანქციების სრული ამოქმედება და შესაბამისი უწყებებისგან კონტროლის ეფექტიანობის გაზრდა მოითხოვეს.