6 თებერვალს, სასტუმრო „შერატონ მეტეხი პალასში" (13:30 - 16:00 საათზე) „პი-ემ-სი კვლევითი ცენტრის" მიერ მომზადებული მიმდინარე კვლევის პრეზენტაცია გაიმართება. პრეზენტაციასთან ერთად გაიმართება საჯარო დისკუსია თემაზე: „საქართველოს საშუალოვადიანი ფისკალური პოლიტიკის მადგრადობის ანალიზი". ღონისძიება ტარდება პროგრამა G-PAC-ის მხარდაჭერით, რომელიც დაფინანსებულია USAID-ის მიერ.
საჯარო დისკუსიის მიზანია 2013 წლის ფისკალურ შედეგების მიმოხილვა და არსებული რისკების იდენტიფიცირება. კერძოდ, განხილული იქნება 2013 წლის ეკონომიკური ზრდის მაჩვენებლები, 2013 წლის სახელმწიფო ბიუჯეტის შესრულების და 2014-17 წლების ბიუჯეტის დაგეგმილი და საპროგნოზო პარამეტრები, დღეისათვის საქართველოს ფისკალური მდგრადობის წინაშე არსებული და შესაძლო გამოწვევები.
კვლევა დაიწყო 2013 წლის დეკემბერში და დასრულდება 2014 წლის ივნისში. კვლევის მიზანია საქართველოს საშუალოვადიანი ფისკალური პოლიტიკის და ფისკალური მდგრადობის ანალიზი და რეკომენდაციების შემუშავება ეფექტიანი და მდგრადი ფისკალური პოლიტიკის მისაღწევად.
ღონისძიებაში მონაწილეობას მიიღებენ საქართველოს სახელმწიფო სექტორის, არასამთავრობო ორგანიზაციების, მედიის, დიპლომატიური კორპუსის და აკადემიური წრეების წარმომადგენლები, ასევე პარლამენტის წევრები.
