დღეს, 6 თებერვალს 17:00 საათზე საქართველოს პარლამენტის ეროვნული ბიბლიოთეკის საგამოფენო დარბაზში ზვიად გამსახურდიას ოფიციალური დოკუმენტების, მიმართვებისა და ინტერვიუების სამტომეულის პრეზენტაცია გაიმართება. სამტომეული ეროვნული ბიბლიოთეკის გამოცემათა სერია "საქართველოს სახელმწიფოს ხელმძღვანელები: ოფიციალური დოკუმენტები, მიმართვები და ინტერვიუების" პირველი გამოცემაა.
საქართველოს სახელმწიფოს ხელმძღვანელების პრესაში გამოქვეყნებული ოფიციალური დოკუმენტების მიმართვებისა და ინტერვიუების შეკრება და ტომებად გამოცემის იდეა ეროვნული ბიბლიოთეკის მეცნიერების, კულტურისა და სამოქალაქო განათლების დეპარტამენტის დირექტორ ემზარ ჯგერენაის ეკუთვნის.
"დემოკრატიულად არჩეული ხელისუფალი მოსახლეობის უმრავლესობის პოლიტიკური, სოციალური, ეკონომიკური და, თუ გნებავთ, ესთეტიკური ღირებულებებისა და წარმოდგენების ამსახველია. მათი ცხოვრება, პოლიტიკური გემოვნება და პოლიტიკური თავგადასავალი საზოგადოების უმრავლესობის ცხოვრება, პოლიტიკური გემოვნება და პოლიტიკური თავგადასავალიცაა. ასეთ მეისტორიეს ასევე შეეძლო ეთქვა: "თუ ძველი "ქართლის ცხოვრება" მეფეების ისტორიაა, ახალი "ქართლის ცხოვრება" ხალხის არჩეული სახელმწიფოს ხელმძღვანელების ისტორიაა" - ასე ხსნიან სამტომეულის წინასიტყვაობის ავტორები ემზარ ჯგერენაია და გიორგი კილაძე გამოცემის მნიშვნელობას.
სამტომეული მოიცავს ბეჭდურ მედიაში ზვიად გამსახურდიას ხელმოწერით გამოქვეყნებულ ოფიციალურ დოკუმენტებს, მიმართვებსა და ინტერვიუებს. პირველ ტომში შევიდა უზენაესი საბჭოს თავმჯდომარეობის პერიოდის მასალები, მეორე ტომში - პრეზიდენტობის პერიოდი, მესამე ტომი დაეთმო დევნილობის პერიოდის მიმართვებსა და ინტერვიუებს. სამტომეულისთვის მასალები შეკრიბა, ბიბლიოგრაფიული აღწერილობა დაურთო და გამოსაცემად მოამზადა პარლამენტის სამეცნიერო საინფორმაციო უზრუნველყოფის განყოფილების უფროსმა სპეციალისტმა მზია ხოსიტაშვილმა.
"საქართველოს სახელმწიფოს ხელმძღვანელები: ოფიციალური დოკუმენტები, მიმართვები და ინტერვიუები" საზოგადოებისთვის ელექტრონულად ხელმისაწვდომია ეროვნული ბიბლიოთეკის ვებგვერდზე www.nplg.gov.ge
პარლამენტის სამეცნიერო საინფორმაციო უზრუნველყოფის განყოფილება (განყოფილების უფროსი ლაშა გველესიანი) მომავალშიც განაგრძობს სერიისთვის "საქართველოს სახელმწიფოს ხელმძღვანელები: ოფიციალური დოკუმენტები, მიმართვები და ინტერვიუები" მასალების მომზადებას. გამოსაცემად უკვე მზადდება ედუარდ შევარდნაძის ოფიციალური დოკუმენტები, მიმართვები და ინტერვიუები.