საქართველოს პრემიერ-მინისტრმა ევროკავშირის ინსტიტუტების წარმომადგენლებთან სამუშაო სადილი გამართა. შეხვედრა ბრიუსელში, საქართველოს საელჩოში გაიმართა და მას ევროკომისიისა და ევროპული საბჭოს წარმომადგენლები, ასევ ევროკავშირის ელჩები დაესწრნენ.
როგორც სიტყვით გამოსვლისას ირაკლი ღარიბაშვილმა აღნიშნა, ეს არის მისი, როგორც პრემიერ-მინისტრის პირველი ვიზიტი ბრიუსელში.
"ჩამოვედი, რათა გადმომეცა ჩვენი ხელისუფლების მთავარი მესიჯი - ჩვენ ვირჩევთ ევროპულ მომავალს. ეს არის არჩევანი, რომელიც გააკეთა ქართველმა ხალხმა. და ჩვენ ყველაფერს გავაკეთებთ საიმისოდ, რომ რაც შეიძლება მოკლე ვადებში მოხდეს ასოცირების ხელშეკრულებაზე ხელმოწერა," - განაცხადა პრემიერმა.
მისივე თქმით, ევროკომისიის პრეზიდენტმა ჟოზე მანუელ ბაროზომ მასთან შეხვედრისას იხუმრა, რომ საქართველო შესაძლოა გინესის წიგნიც აღმოჩნდეს, რომელმაც მოახერხა ყველაზე სწრაფად დაესრულებინა მოლაპარაკებები.
"მე ვიქნები ბედნიერი, თუ ჩვენ ამ რეკორდს მოვხსნით. ასოცირების ხელშეკრულების ხელმოწერა იქნება საქართველოსთვის ყველაზე კარგი მცველი შიდა თუ გარე რისკებისგან. ის გაგვიხსნის გზას, რათა ავაშენოთ ევროპული, განვითარებული საქართველო", - დასძინა საქართველოს პრემიერმა.
სამუშაო სადილზე ასევე სიტყვით გამოვიდა ევროპული საგარეო ქმედებათა სამსახურის ევროპისა და ცენტრალური აზიის აღმასრულებელი დირექტორი, ფერნანდეს დე ლა პენია. მან პოზიტიურად შეფასა საქართველოში მიმდინარე რეფორმები და გამოთქვა მისი გაგრძელების იმედი. მანვე აქცენტი გააკეთა საქართველოსა და ევროკავშირს შორის მჭიდრო ურთიერთობების სიკეთეზე, მათ შორის ინვესტიციების მოზიდვის კუთხით