ფინანსთა სამინისტროს საფინანსო-ანალიტიკურმა სამსახურმა ქვეყნის საჯარო ფინანსების მართვის ერთ-ერთი მთავარი კომპონენტის - „ბიუჯეტის მართვის ელექტრონული სისტემის" ძველი ვერსია ჩაანაცვლა თვისებრივად ახალი ვერსიით, რომელიც მთლიანობაში გაცილებით უფრო ეფექტიანს გახდის ბიუჯეტის მართვის პროცესს.
ახალი სისტემა ძველისგან განსხვავდება შემდეგი მონაცემებით: ტექნოლოგიურად შეიცვალა სისტემის ბირთვი, რაც ბიუჯეტის წინაშე დასმული ამოცანების ნაკლები დროითა და რესურსებით შესრულების საშუალებას იძლევა, გაიზარდა სისტემის უსაფრთხოება და დაცულობა, სისტემას დაემატა დინამიური კონფიგურაციის ფუნქციონალი, რაც დამკვეთის ცვალებად მოთხოვნებთან მარტივი ადაპტაციის საშუალებას იძლევა, სისტემა გახდა მრავალენოვანი, გაფართოვდა მონაცემთა ანალიზისა და ანგარიშგების ფუნქციონალი და სხვა.
„ბიუჯეტის მართვის ელექტრონული სისტემის" გამოყენებით ხორციელდება საქართველოს ცენტრალური, ავტონომიური რესპუბლიკებისა და ადგილობრივი ხელისუფლებების ფუნქციებისა და ვალდებულებების შესრულების მიზნით მისაღები შემოსულობების, გასაწევი გადასახდელებისა და ნაშთის ცვლილების, ასევე სსიპ-ების და ა(ა)იპ-ების ბიუჯეტებისა და სახელმწიფოს წილობრივი მონაწილეობით მოქმედი საწარმოების ფინანსური მონაცემების მართვა.
