სასამართლო ხელისუფლების დამოუკიდებლობის უზრუნველსაყოფად, 2014 წლის სახელმწიფო ბიუჯეტში მოსამართლეთა შრომის ანაზღაურების ზრდა და სოციალური გარანტიების მოწესრიგება იგეგმება.
სწორედ აღნიშნულ საკითხზე ისაუბრეს დღეს ფინანსთა მინისტრმა, ნოდარ ხადურმა და იუსტიციის უმაღლესი საბჭოს მდივანმა, ლევან მურუსიძემ ფინანსთა სამინისტროში გამართულ შეხვედრაზე.
მიღწეული შეთანხმებით, შეიქმნება სამუშაო ჯგუფი, რომელიც მომავალი წლის ბიუჯეტში აღნიშნული საკითხების მოგვარებაზე იმუშავებს.
„პრემიერ-მინისტრის დავალებით იუსტიციის უმაღლესი საბჭოს მდივანთან ხშირი კონტაქტი გვაქვს. მიგვაჩნია, რომ სასამართლო ხელისუფლების ფინანსური დამოუკიდებლობის უზრუნველსაყოფად ერთ-ერთი მნიშვნელოვანი ფაქტორია ის, რომ მოსამართლეებს, სასამართლო სისტემაში, ისევე როგორც იუსტიციის საბჭოში მომუშავე თანამშრომლებს ჰქონდეთ შრომის ღირსეული ანაზღაურება, რაც მნიშვნელოვნად გაამყარებს სასამართლო ხელისუფლებას. დღეს შევთანხმდით, რომ უკვე კონკრეტულ მაჩვენებლებზე სამუშაო ჯგუფის ფორმატში გავაგრძელებთ მუშაობას და უკვე 2014 წლის ბიუჯეტში აისახება როგორც მოსამართლეების, ისე აპარატის თანამშრომლების ხელფასების მნიშნელოვანი ზრდა," - განაცხადა ფინანსთა მინისტრმა ნოდარ ხადურმა.
„შედგა ძალიან ნაყოფიერი შეხვედრა. ეს იყო ბატონ პრემიერ-მინისტრთან, ბიძინა ივანიშვილთან გამართული შეხვედრის გაგრძელება, სადაც საუბარი გვქონდა მოსამართლეთა ხელფასების ზრდასა და სოციალური გარანტიების საკითხებზე. დღეს ფინანსთა მინისტრთან ერთად კონკრეტულად ვისაუბრეთ დეტალებზე. მივიღეთ დაპირება თუ როგორ უნდა მოხდეს აღნიშნული პრობლემის მოგვარება. ეს ეხება როგორც მოსამართლეთა ხელფასებს, ასევე სასამართლოს აპარატის თანამშრომელთა ხელფასების ზრდას, რათა ეს საკითხი ერთხელ და სამუდამოდ მოგვარდეს," - განაცხადა იუსტიციის უმაღლესი საბჭოს მდივანმა, ლევან მურუსიძემ.
ინიციატივა მოსამართლეთა ხელფასების მოწესრიგების შესახებ პრემიერ-მინისტრს, ბიძინა ივანიშვილს ეკუთვნის. სწორედ მისი დავალებით დაიწყო მუშაობა ფინანსთა სამინისტრომ სასამართლო სისტემაში შრომის ანაზღაურების მოწესრიგების საკითხებზე.
