14 ოქტომბრიდან რუსეთში ქართული ციტრუსისა და ხილის შეტანა დაიწყება, აღნიშნულის შესახებ განცხადებას რუსეთის სოფლის მეურნეობის სამინისტროს ზედამხედველობის სამსახურში აკეთებენ. მათი ინფორმაციით, აღნიშნული გადაწყვეტილება რუსი ექსპერტების მიერ უკვე მიღებულია.
აჭარის სოფლის მეურნეობის მინისტრის ზაურ ფუტკარაძის განმარტებით, ციტრუსის სეზონი რეგიონში რეალურად ნოემბრიდან იწყება და მინისტრის ინფორმაციით, რუსეთის მიმართულებით ქართული ციტრუსის პირველი პარტია დაახლოებით ნოემბრის პირველ ნახევარში გადაიზიდება. ზაურ ფუტკარაძის განმარტებით, რუსეთში ციტრუსის ტრანსპორტირებისთვის განიხილება ორი ძირითადი ვარიანტი: საზღვაო და საგზაო. მინისტრის განმარტებით, ქართული ციტრუსი რუსეთში ლარსის საბაჟო-გამშვები პუნქტის გავლით შევა და გამორიცხული არ არის, რომ ციტრუსის გატანა თავად რუსულმა კომპანიებმა უზრუნველყოს, რომლის მანქანებიც შემოვლენ საქართველოს ტერიტორიაზე და თავად გაიტანენ პროდუქციას.
ხოლო რაც შეეხება საზღვაო ტრანსპორტს, ქართული მხარე ციტრუსის ტრანსპორტირებისთვის სამ პორტს: ნოვორასიისკის პორტს, გენეჯიკის პორტს და პორტ კავკაზს განიხილავს.
როგორც აჭარის სოფლის მეურნეობის მინისტრი განმარტავს, 1-ელი ნოემბრიდან რეგიონში ციტრუსის შემფუთავ/დამახარისხებელი საწარმოებიც ამოქმედდება, რომლებიც საექსპორტო პროდუქციის შეფუთვა/დახარისხებას განახორციელებენ.
აღსანიშნავია, რომ წელს აჭარაში 110 ათასი ტონა ციტრუსის მოსავალს ელოდებიან.
