შვეიცარიული კომპანია "F.Hoffmann- La Roche" და "პსპ-ს ჯგუფი"-ს წევრი "ჯი-ემ-პი" ურთიერთთანამშრომლობას იწყებენ. როგორც „სპს ჯგუფში" განმარტავენ, აღნიშნული თანამშრომლობის შედეგად "F.Hoffmann-La Roche"-ს მიერ შვეიცარიაში დამზადებული C ჰეპატიტის სამკურნალო საშუალება პეგინტერფერონის აქტიური მოქმედი ნივთიერება, წარმოების ბოლო ეტაპს ქართულ ფარმაცვეტულ საწარმო "ჯი-ემ-პი-ში" გაივლის.
"შვეიცარიელებმა არჩევანი ქართულ საწარმო "ჯი-ემ-პი"-ზე ხარისხის არაერთი საკონტროლო აუდიტის შედეგად გააკეთეს, რის საფუძველზეც თანამედროვე, მაღალტექნოლოგიური პრეპარატი წარმოების ბოლო ეტაპს "ჯიემპი"-ში გაივლის და საბოლოო სახეს მიიღებს ადგილობრივი პროდუქტის საახით, რაც მნიშვნელოვნად შეამცირებს C ჰეპატიტის მკურნალობის ღირებულებას" - განაცხადა "F.Hoffmann- La Roche"- წარმომადგენლობის ხელმძღვანელმა საქართველოში - გიორგი რამიშვილმა.
"ეს არის პირველი პრეცედენტი, როცა საერთაშორისო კომპანიამ ქართული საწარმო აირჩია პარტნიორად, რაც იმის დასტურია, რომ ჯიემპის საწარმო სრულად აკმაყოფილებს წარმოების საერთაშორისო სტანდარტებს. ჩვენი კომპანიის განვითარების პრიორიტეტი ექსპორტის ზრდაა, 2018 წლისთვის ვგეგმავთ ეტაპობრივად გავზარდოთ ექსპორტის მოცულობა 100 მლნ დოლარამდე" - განაცხადა "ჯი-ემ-პი-ს" გენერალურმა დირექტორმა - გიორგი ანთაძემ.