სავაჭრო ცენტრ "საბას" ტერიტორიაზე მოვაჭრე გადამხდელების საყურადღებოდ საქართველოს ფინანსთა სამინისტრო საბოლოოდ განმარტებას აკეთებს. როგორც ფინანსთა სამინისტროს განცხადებაშია აღნიშნული, ფინანსთა სამინისტრო გაგებით მოეკიდა და გაითვალისწინა სავაჭრო ცენტრ "საბას" ტერიტორიაზე მოვაჭრე გადამხდელების პრობლემები და მათ დასახმარებლად გააკეთა ყველაფერი საკუთარი უფლებამოსილების ფარგლებში.
„ფინანსთა სამინისტროს შემოსავლების სამსახურმა, შექმნილი ვითარების გათვალისწინებით, გადაუვადა მათ წლიური დეკლარაციების წარდგენის ვადა;
38-ვე გადამხდელს, რომლებმაც მოგვმართეს იძულებითი ღონისძიებების (ინკასო, ყადაღა) გაუქმების (არ გამოყენების) თაობაზე, დაუკმაყოფილდათ აღნიშნული მოთხოვნა;
გარდა ამისა, მიმდინარე წლის 20 ივნისს საქართველოს ფინანსთა მინისტრმა, ნოდარ ხადურმა გამოიჩინა კეთილი ნება და პირადად გაუგზავნა თხოვნის წერილები ყველა იმ კომერციული ბანკის ხელმძღვანელს, რომელსაც გაცემული ჰქონდა სესხი სავაჭრო ცენტრ "საბას" ტერიტორიაზე მოვაჭრე გადამხდელთათვის (ინფორმაცია მოგვაწოდეს თავად გადამხდელებმა), რათა მათ მოქმედი კანონმდებლობის შესაბამისად, გადაეხედათ ბანკებისადმი არსებული დავალიანების საკითხისათვის.
შედეგად, მეწარმეთა მიერ წარმოდგენილი სიიდან რვავეს საკითხი ბანკების მხრიდან განხილულ იქნა ინდივიდუალურად და რეალურად განხორციელდა მათი საბანკო დავალიანების რესტრუქტურიზაცია - გადავადება"- ნათქვამია სამინისტროს განცხადებაში.
ფინანსთა სამინისტროს ინფორმაციით, 25 სექტემბერს, საქართველოს ფინანსთა სამინისტროს წარმომადგენელთან გამართულ მორიგ შეხვედრაზე, მეწარმეებმა დაადასტურეს ბანკების მიერ მათთვის სესხების გადავადების ფაქტი, თუმცა კვლავ მოითხოვეს ზარალის ანაზღაურება მთავრობის სარეზერვო ფონდიდან.
„საქართველოს ფინანსთა სამინისტრო კატეგორიულად აცხადებს, რომ ჩვენმა უწყებამ და პირადად მინისტრმა, ნოდარ ხადურმა ყველაფერი გააკეთა საკუთარი კომპეტენციის ფარგლებში და დღეიდან აღნიშნულ საკითხთან დაკავშირებით აღარ აპირებს დამატებითი განმარტებების გაკეთებას"- ნათქვამია განცხადებაში.