საქართველოში ყველაზე დიდი რაოდენობით ყავა ინდონეზიიდან შემოდის. „საქსტატის" ინფორმაციით, ბოლო წლების განმავლობაში იმპორტირებული ყავის უდიდესი ნაწილი ინდონეზიაზე მოდის. სტატისტიკური ინფორმაციის მიხედვით, 2013 წლის იანვარ-აგვისტოს მონაცემებით, ყავის მთლიან იმპორტში ინდონეზიური ყავის წილი 68%-ია.
2013 წლის იანვარ-აგვისტოში საქართველოში სულ იმპორტირებულია 2,839.1 ტონა ყავა, მაშინ როდესაც 2012 წლის იანვარ-აგვისტოში ქვეყანაში 3,149.0 ტონა ყავა შემოიტანეს. შესაბამისად, 2013 წლის 8 თვეში ყავის იმპორტი გასული წლის იმავე პერიოდთან შედარებით 10 %-ითაა შემცირებული.
ინდონეზიის გარდა ყავის უმსხვილესი იმპორტირებია ასევე სომხეთი, ვიეტნამი, რუსეთი, იტალია, ინდოეთი.
აღსანიშნავია, რომ 2013 წლის 8 თვეში საქართველოში 8,254.6 ათასი დოლარის ღირებულების ყავაა შემოტანილი, ხოლო 2012 წლის იმავე პერიოდში კი 9,354.5 ათასი დოლარის ღირებულების ყავა.
სტატისტიკური ინფორმაციის მიხედვით, 2012 წელს საქართველოში 4,738.2 ტონა ყავის იმპორტი დაფიქსირდა, 2011 წელს კი ქვეყანაში 4,652.7 ტონა ყავა შემოიტანეს..
