„ზაფხულის ტურისტული სეზონი საკმაოდ წარმატებულად მიმდინარეობდა. საერთაშორისო ვიზიტორების ზრდა არის 26 % -ი და მინდა ავღნიშნო, რომ საქართველოს ეკონომიკაში ტურიზმის წილი უკვე 7,3 %-ია. გაზრდილია ასევე განთავსების საშუალებების რაოდენობა. წინ გვაქვს ზამთრის სეზონი და წლის ბოლომდე 5 მლნ ვიზიტორს ველოდებით. ეხლა გვაქვს მნიშვნელოვანი საქმე - ინფრასტრუქტურის მოწესრიგება. მარტო ის არ არის, რომ ტურისტები დავპატიჟოთ. თუ ამ ადამიანებს სათანადოდ ვერ დავხვდით რეკლამა კი არა ნატირეკლამა გამოგვივა"- განაცხადა ტურიზმის ადმინისტრაციის ხელმძღვანელმა გიორგი სიგუამ.
სიგუას განმარტებით, საერთაშორისო მოგზაურების რაოდენობამ რვა თვის ჯამური მონაცემებით 3 მლნ 568 ათას 518 შეადგინა, ზრდა წინა წლის ანალოგიურ მაჩვენებელთან შედარებით 26%-ია.
სიგუა აცხადებს, რომ რვა თვის მონაცემებით თურქეთი განაგრძობს ლიდერობას 1 109 920 საერთაშორისო მოგზაურით.
„მას მოსდევს დანარჩენი მეზობელი ქვეყნები სომხეთი 820 043, აზერბაიჯანი 686 671, რუსეთი 515 989. მთლიანობაში მეზობელი ქვეყნებიდან 3 132 623 საერთაშორისო მოგზაური შემოვიდა, რაც მთლიანი რაოდენობის 88%-ს შეადგენს.
წლის წლის ანალოგირ პერიოდთან შედარებით მნიშვნელოვანი ზრდა შეინიშნება რუსეთის ფედერაციიდან 54%, უკრაინიდან 69%, პოლონეთიდან 72% და ერაყიდან 931%"- აცხადებს გიორგი სიგუა.
სტატისტიკური ინფორმაციის მიხედვით, საქართველომ აგვისტოში 770 ათას 608 საერთაშორისო მოგზაური მიიღო, რაც 28%-ით აღემატება გასული წლის ანალოგიურ მაჩვენებელს.
ტურიზმის ეროვნული ადმინისტრაციის ხელმძღვანელის განმარტებით, საერთაშორისო მოგზაურების ყველაზე დიდი რაოდენობა აგვისტოზე მოდის. სტატისტიკურად საქართველოში შემოსული მოგზაურების უდიდესი წილი ზაფხულის სეზონზე აღინიშნება.
აღსანიშნავია, რომ აგვისტოში საერთაშორისო მოგზაურების რაოდენობით ლიდერობს სომხეთი 199 830 მოგზაურით, მას მოსდევს თურქეთი 198 493 მოგზაურით. რუსეთი 139 502 მოგზაურით და აზერბაიჯანი 136 128 მოგზაურით.
ხოლო წინა წლის ანალოგირ პერიოდთან მნიშვნელოვანი ზრდა შეინიშნება ბელორუსიიდან 82%, ყაზახეთიდან 56%, პოლონეთიდან 44%, ერაყიდან 1286%, უკრაინიდან 59% და რუსეთიდან 44%.