საქართველოს ფინანსთა სამინისტრო საგადასახადო და საბაჟო კანონმდებლობის გამიჯვნაზე იწყებს მუშაობას. ფინანსთა მინისტრის, ნოდარ ხადურის ხელმძღვანელობით, შეიქმნა სპეციალური ჯგუფი, რომელიც ამ პროცესს გაუწევს კოორდინაციას. საგადასახადო კოდექსი, რომელშიც საგადასახადო და საბაჟო კანონმდებლობა გაერთიანდა 2011 წელსაა მიღებული.
ფინანსთა სამინისტროს პოზიციაა, მომავალი საბაჟო კოდექსის შექმნაში აქტიური მონაწილეობა მიიღონ ექსპერტებმა და ბიზნეს-სექტორის წარმომადგენლებმა. დისკუსია საჯარო იქნება და საკუთარი წინადადებების შეთავაზება ყველა დაინტერესებულ მხარეს შეეძლება.
„წინა ხელისუფლება ქმნიდა ილუზიას, თითქოს ქვეყანაში მარეგულირებელი დოკუმენტების რაოდენობას ამცირებდა, რის გამოც, ხშირად ეკლექტურად აერთიანებდა აბსოლუტურად სხვადასხვა სფეროს მარეგულირებელ კანონმდებლობას, მათ შორის, იყო საგადასახადო და საბაჟო კოდექსები. ამასთან, საქართველოს აღებული აქვს საერთაშორისო ვალდებულება ევროკავშირთან ასოცირების ხელშეკრულების მომზადების ფარგლებში, ჩვენი კანონმდებლობა, მათ შორის, საბაჟო სფეროში, მოვიყვანოთ შესაბამისობაში ევროპულ კანონმდებლობასთან, ამიტომ მივიღეთ გადაწყვეტილება და ფინანსთა სამინისტრომ დაიწყო მუშაობა საგადასახადო და საბაჟო კანონმდებლობის გამიჯვნაზე. მინდა ვთხოვო იმპორტიორ და ექსპორტიორ კომპანიებს, ადამიანებს, რომლებსაც შეხება აქვთ საბაჟო სფეროსთან, აქტიური მონაწილეობა მიიღონ ამ დოკუმენტზე მუშაობის პროცესში, რათა ჩვენ საბოლოოდ მივიღოთ დოკუმენტი, რომელიც რეალურად იმუშავებს და მოხსნის იმ პრობლემებს, რომელიც დღეისთვის შეიძლება კიდევ არსებობდეს," - განაცხადა ფინანსთა მინისტრმა, ნოდარ ხადურმა.
ახალ კანონმდებლობაში დეტალურად აისახება საბაჟო ადმინისტრირების მექანიზმები და პროცედურები. შეიზღუდება ფინანსთა მინისტრის კომპეტენცია და რეგულაციების დიდ ნაწილს საბაჟო სფეროში კვლავ საქართველოს პარლამენტი განსაზღვრავს. საბაჟო კოდექსი გადამხდელებს გაუადვილებს ინფორმაციის მიღებას და ხელს შეუწყობს თანამედროვე საბაჟო სისტემის ჩამოყალიბებას.
მასალის გამოყენების პირობები
