„ნაციონალური მოძრაობა" ეკონომიკის შენელებით და უმუშევრობის სწრაფი ზრდით შეშფოთებულია. როგორც პარტიაში განმარტავენ, რომ ეკონომიკის დაღმასვლის კიდევ ერთი უტყუარი სიმპტომია საგარეო ვაჭრობის ბრუნვის მზარდი შემცირება, რასაც სტატისტიკის დეპარტამენტიც ადასტურებს. საყურადღებოა, რომ მაისის თვეში შემცირებულია როგორც იმპორტი ასევე ექსპორტი.
უმცირესობის ერთ-ერთი ლიდერის გიორგი ვასაძის განმარტებით, მთავრობის მიერ ეკონომიკის სფეროში ზედიზედ დაშვებული შეცდომების, არასწორი ნაბიჯების და ოპოზიციის დევნით გამოწვეული არასტაბილურობის განცდის გამო საქართველოს ეკონომიკა განაგრძობს სტაგნაციას რასაც მნიშვნელოვანი ზიანი მოაქვს ჩვენი მოქალაქეებისთვის. სტატისტიკის დეპარტამენტისვე მონაცემებით, მხოლოდ 2013 წლის პირკველ კვარტალში სამსახური დაკარგა 42,000 ადამიანმა. ამ მონაცემში არ შედის ათეულ ათასობით ადამიანი რომელთაც ინფრასტრუქტურული პროექტების შეჩერების გამო სამუშაო ფაქტობრივად დაკარგეს და ხელფასს აღარ იღებენ. სამწუხაროდ, ტენდენცია ღრმავდება და 2013 წლის აპრილი - მაისის ეკონომიკური მონაცემები კიდევ უფრო უარყოფითია, რის შედეგადაც ყოველდღიურად იკარგება ასობით სამუშაო ადგილი.
„ეკონომიკის შენელება ბუნებრივად იწვევს ბიუჯეტის შევსების მწვავე პრობლემას. ფინანსთა სამინისტროს მონაცემებით, მხოლოდ პირველ კვარტალში სახელმწიფო ბიუჯეტს 80 მილიონი ლარი დააკლდა. თუ ნეგატიური პროცესები იგივე ტემპით გაგრძელდა, სახელმწიფო დადგება არა მხოლოდ უმუშევრობის კიდევ უფრო მეტი ზრდის, არამედ საკუთარი ვალდებულებების ვერშესრულების საფრთხის წინაშე," განაცხადა პარლამენტის წევრმა ერთიანი ნაციონალური მოძრაობიდან გიორგი ვაშაძემ.
„ავტორიტეტულმა საერთაშორისო საფინანსო ორგანიზაციებმა როგორებიცაა მსოფლიო ბანკი, FITCH და საერთაშორისო სავალუტო ფონდმა ერთმანეთის მიყოლებით შეამციერეს საქართველოს ეკონომიკური ზრდის პროგნოზები და გააკრიტიკეს მთავრობის ეკონომიკური პოლიტიკა. ეს ყველაფერი ნდობას უკარგავს ინვესტორებს რის გამოც საქართველოს ეკონომიკაში ფულს პრაქტიკულად აღარავინ დებს. უკვე აღარავის სჯერა ივანიშვილის მიერ წლის ბოლომდე შეპირებული 60 ქარხნის გახსნა, რომელიც უბრალოდ ტყუილი დაპირება აღმოჩნდა" დასძინა მან.
ვაშაძის შეფასებით, ეკონომიკური ვარდნას ძირითადად სამი მიზეზი განაპირობებს: რეგულაციების გამკაცრების მოლოდინი, ახალი შრომის კოდექსი და ზოგადად პარლამენტართა და ხელისუფლების წარმომადგენელთა მხრიდან გაუთვლელი განცხადებები სხვადასხვა აკრძალვებისა თუ დაუგეგმავი ცვლილებების შესახებ.