,,საბიუჯეტო სახსრების გაფლანგვის ყოველი ფაქტი პროკურატურამ აუცილებლად უნდა შეისწავლოს", -ნათქვამია კოალიცია ,,ქართული ოცნების" მაჟორიტარი დეპუტატის თამარ კორძაიას განცხადებაში, რომელიც ირინა იმერლიშვილის განცხადებას ეხმიანება. ,,ჯი-ეიჩ-ენი" განცხადებას უცვლელად გთავაზობთ, ,,17 აპრილს, საქართველოს პროკურატურამ ირინა იმერლიშვილს მისივე სადეპუტატო მოთხოვნის საფუძველზე გადასცა სპეციალური სამსახურის მიერ გაწეულ ხარჯებთნ დაკავშირებით მრავალტომიანი მასალები , რომელმაც, ბოლოს და ბოლოს ნათელი მოჰფინა ნაციონალური მოძრაობის ისტერიკას, თუ რატომ ეწინააღმდეგებოდნენ ოპოზიციონერი დეპუტატები და პირველ რიგში საქართველოს პრეზიდენტი სახელმწიფო დაცვის სპეციალური სამსახურის შესახებ კანონში შესატან ცვლილებებს. ამ ცვლილებების მიხედვით, პრეზიდენტის დაქვემდებარებაში მყოფი დაცვის სამსახური მთავრობის დაქვემდებარებაში გადავიდა, რამაც გამოიწვია გრიფით საიდუმლო მუხლებისთვის გრიფის მოხსნა. ახლა ყველასთვის ხელმისაწვდომია შოკისმომგვრელი ინფორმაცია იმ საიდუმლო ხარჯების შესახებ, რაში იხარჯებოდა დაცვის სამსახურისთვის გამოყოფილი თანხები. პროკურატურის ინფორმაციამ დიდი უხერხულობა უნდა შეუქმნას იმ ოპოზიციონერ დეპუტატებს, რომელთა სამაჯურებზე, კაზინოებში გართობასა თუ სარელაქსაციო პროცედურებზე იხარჯებოდა საქართველოს ბიუჯეტის დიდი ნაწილი მაშინ, როდესაც ჩვენი მოქალაქეების რეალურად იდგნენ უმუშევრობის, შიმშლის და აბსოლუტური უსახსრობის წინაშე. ზემოჩამოთვლილი ხარჯები უნდა გაწეულიყო ქვეყნის უსაფრთხოებისთვის და არა კონკრეტული სახელისუფლო ჩინების ფუფუნებისთვის.მე ყოველ დღე ვუყურებ, თუ რა გაუსაძლის პირობებში უწევს ცხოვრება ნაძალადევის მოსახლეობას. ამ ფონზე განსაკუთრებით ძნელად აღსაქმელია ყოველივე ის რაზეც ზემოთ ვისაუბრე, ეს უკვე ცდება კანონის ფარგლებს. აქ უკვე მთავარი ზნეობა და მორალია.საბიუჯეტო სახსრების გაფლანგვის ყოველი ფაქტი აუცილებლად უნდა შეისწავლოს პროკურატურამ, რომელიც სამართლებრივად გასცემს პასუხს ვინ და რა დოზითაა დამნაშავე ქვეყნისა და ქართველი ხალხის წინაშე. ერთხელ და სამუდამოდ ყველაფერს უნდა აეხადოს ფარდა, რათა ,,დაჩაგრულის მანტიის" მოსხმა ვეღარ შეძლონ დამნაშავეებმა. საქართველოს მოქალაქეებს აქვთ იმის უფლება, გაიგონ, თუ რატომ ცხოვრობდნენ ასეთ უკიდურეს სიღატაკეში წლების განმავლობაში", _ნათქვამია განცხადებაში.
შეგახსენებთ, რომ პარლამენტის საპროცედურო საკითხთა კომიტეტის თავმჯდომარის, ირინა იმერლიშვილის განცხადებით, საქართველოს პრეზიდენტის, მისი ოჯახის, ახლობლების, სხვა მოქმედი თუ ყოფილი თანამდებობის პირების "ფუფუნების საგნებზე" "შოკისმომგვრელი თანხები" იხარჯებოდა.როგორც იმერლიშვილმა პარლამენტში, უმრავლესობის ლიდერ დავით საგანელიძესთან ერთად გამართულ პრესკონფერენციაზე განაცხადა, აღნიშნულის შესახებ საუბარია დოკუმენტაციაში, რომელიც მან სახელმწიფო დაცვის სპეციალური სამსახურისგან გამოითხოვა და, რომელზეც წვდომა მას შემდეგ შეძლო, რაც პროკურატურის დახმარებით ხარჯებს გრიფით "საიდუმლო" მოეხსნა.