ბათუმში ჩატარდა მოძრაობა სამართლიანი საქართველოსთვის ზონალური კონფერენცია, რომელშიც მონაწილეობდნენ მოძრაობის აჭარის, სამეგრელოსა და გურიის რეგიონული და რაიონული ორგანიზაციების ხელმძღვანელები და კურატორები. ღონისძიებაზე, რომელსაც მოძრაობის ლიდერი ზურაბ ნოღაიდელი უძღვებოდა, განიხილეს არჩევნების მონიტორინგის და გაყალბების პრევენციის თემატიკა. მოძრაობის რაიონულ ოფისებს შორის კოორდინაციის და საორგანიზაციო საკითხები.
ნოღაიდელმა მოისმინა ინფორმაცია რეგიონულ და რაიონულ ორგანიზაციებში წინასაარჩევნო სამზადისის მიმდინარეობის შესახებ, დაინტერესდა პროგრამა "კარდაკარის" მიმდინარეობით. მოძრაობის რეგიონულმა და რაიონულმა ლიდერებმა ხაზგასმით აღნიშნეს, რომ ხელისუფლების მხრიდან დღითიდღე ძლიერდება ზეწოლა ნოღაიდელის თანაპარტიელებსა და მხარდამჭერებზე.
ნოღაიდელმა ზონალური კონფერენციის მონაწილეებს გააცნო მოქმედების წესი არჩევნებთან დაკავშირებული დარღვევების გამოსავლენად, რა სახის დარღვევებზე უნდა გაამახვილონ მათ ყურადღება და რა ფორმით უნდა მოხდეს ამ დარღვევებზე რეაგირება.
"სააკაშვილს არჩევნების გაყალბება დაწყებული აქვს, ეს პროცესი ნაციონალური მოძრაობის შტაბიდან იმართება. ცესკოს თავმჯდომარე კი ამ პროცესებზე მხოლოდ ბეჭდის დამსმელია. ასეთ მდგომარეობას არ შევეგუებით", - აღნიშნა ნოღაიდელმა.
მისი თქმით, ხელისუფლების მიერ შემუშავებული არჩევნების გაყალბების მექანიზმები აუცილებლად უნდა მოიშალოს.
"თქვენგან მე მჭირდება ხმაში გარეული რკინა" - მოუწოდებს ლიდერი თანაგუნდელებს.
ზონალურ კონფერენციაზე ზურაბ ნოღაიდელმა საგარეო პოლიტიკის ურთიერთობებზე, კერძოთ, კი რუსეთთან დიალოგის საკითხზეც ისაუბრა. მოძრაობის ლიდერის განცხადებით, ის მხოლოდ რუსეთთან ურთიერთობებით არ შემოიფარგლება.
"კონტაქტები გვაქვს ყაზახეთის ხელისუფლებასთან, ასევე, ვგეგმავ ვიზიტს ბრიუსელში, აზერბაიჯანსა და სომხეთში"- ზურაბ ნოღაიდელი.
ღონისძიების დასასრულს ზურაბ ნოღაიდელმა, მოძრაობის თავმჯდომარის მოადგილესთან ლევან როინიშვილთან და საორგანიზაციო მდივანთან ლადო ბოჟაძესთან ერთად კონფერენციის მონაწილეთა შეკითხვებს უპასუხა.
