სახელმწიფო უმაღლეს დაწესებულებებში ბაკალავრიატის რამდენიმე წამყვანი მიმართულების 17 სპეციალობაზე სტუდენთა სწავლის სრული კურსი დაფინანსდება.
ამის შესახებ განათლების მინისტრმა გიორგი მარგველაშვილმა დღეს იაკობ გოგებაშვილის სახელობის თელავის სახელმწიფო უნივერსიტეტის სტუდენტებსა და პროფესორ-მასწავლებლებთან შეხვედრისას განაცხადა.
მინისტრმა სტუდენტებს სამინისტროს ახალი ინიციატივა გააცნო და აღნიშნა, რომ დაფინანსდება აგრონომიის, ვეტერინარია, განათლების მეცნიერებების, მასწავლებლის განათლების, საინჟინრო ფიზიკის, ენერგეტიკისა და ელექტროინჟინერიის და მშენებლობის სპეციალობები.
სწავლის საფასური სრულად ანაზღაურდება ასევე, მათემატიკის, ფიზიკის, ქიმიის, ბიოლოგიის, ეკონომიკის, არქეოლოგიის, ისტორიის - საქართველოს ისტორიის სპეციალიზაციით, ფილოლოგიის - ქართული ფილოლოგიის სპეციალიზაციით, ფილოსოფიის და არქიტექტურის სპეციალობაზე მოხვედრის შემთხვევაში.
გიორგი მარგველაშვილმა თელავის სახელმწიფო უნივერსიტეტის სტიქიის შედეგად დაზარალებულ სტუდენტებს, 2012-2013 სასწავლო წლის სწავლის საფასურის დაფინანსებასთან დაკავშირებით, სამინისტროს საბოლოო გადაწყვეტილება გააცნო.
მინისტრმა ასევე ისაუბრა კახეთის რეგიონისთვის მნიშვნელოვანი დარგების განვითარებისა და აგრარულ სფეროში პროფესიონალი კადრების მომზადების აუცილებლობაზე. ამ მიზნის განხორციელებაში მან უნივერსიტეტს მხარდაჭერა და დახმარება აღუთქვა.