აჭარის ა/რ ჯანმრთელობისა და სოციალური დაცვის მინისტრი ნუგზარ სურმანიძე ოფიციალური ვიზიტით თურქეთის რესპუბლიკაში იმყოფება. სამთავრობო დელეგაციას აჭარის ა/რ მთავრობის თავმჯდომარე არჩილ ხაბაძე ხელმძღვანელობს.
ქართულმა დელეგაციამ შეხვედრები უკვე გამართა თურქეთის მეჯლისის წევრებთან, საგარეო საქმეთა მინისტრთან, რიზეს და ართვინის გუბერნატორებთან.
ვიზიტის ფარგლებში არჩილ ხაბაძე და ნუგზარ სურმანიძე თურქეთის საერთაშორისო თანამშრომლობისა და განვითარების სააგენტოს „თიკას" პრეზიდენტსაც შეხვდნენ. ქართული მხარე "თიკას" პრეზიდენტს ბათუმის ინფექციური საავდმყოფოს რეაბილიტაციის საკითხზე ესაუბრა. თურქული სააგენტო ქართველი სტუდენტებისა და სამედიცინო სფეროს წარმომადგენლებისთვის კვალიფიკაციის ასამაღლებლად სასწავლო კურსის შემუშავებასაც გეგმავს.
სამთავრობო დელეგაცია რიზეს უნივერსიტეტშიც იმყოფებოდა. უმაღლეს სასწავლებელში განათლებას 49 ქართველი სტუდენტი ღებულობს. აჭარის ა/რ ჯანმრთელობისა და სოციალური დაცვის მინისტრის თქმით, სამედიცინო ფაკულტეტის წარმატებული სტუდენტები სამშობლოში დაბრუნების შემდეგ აჭარის სამედიცინო დაწესებულებებში დასაქმდებიან.
