საპენსიო სისტემის რეფორმირებაზე ამიერიდან სპეციალური უწყებასთაშორისი საბჭო იზრუნებს. როგორც სააგენტო "ჯი-ეიჩ-ენს" ეკონომიკისა და მდგრადი განვითარების სამინისტროდან აცნობეს, საპენსიო სისტემის რეფორმის საკითხებზე უწყებათაშორისი საბჭო უკვე შეიქმნა და მის შემადგენლობაში სხვადასხვა უწყებების მაღალი რანგის ჩინოვნიკები არიან გაერთიანებულნი. საბჭოს მუშაობის მთავარი დანიშნულება ერთიანი საპენსიო რეფორმის მომზადებაა, რაშიც კანონმდებლობის დახვეწასთან ერთად საერთაშორისო ორგანიზაციებთან თანამშრომლობაც იგულისხმება. ეკონომიკისა და მდგრადი განვითარების სამინისტროს ინფორმაციით, საბჭოს შემადგენლობაში შედიან, ეკონომიკისა და მდგრადი განვითარების მინისტრი გიორგი კვირიკაშვილი, მინისტრის მოადგილე ირაკლი მატკავა, ჯანმრთელობისა და სოციალური დაცვის მინისტრის მოადგილე დავით ლომიძე, ფინანსთა მინისტრის მოადგილე დავით ლეჟავა, სებ-ის ვიცე-პრეზიდენტი ოთარ ნადარაია, პარლამენტის საფინანსო-საბიუჯეტო კომიტეტის თავმჯდომარე დავით ონოფრიშვილი, "საქსტატის" აღმასრულებელი დირექტორის მოადგილე თენგიზ ცეკვავა.