დღეს, 12.00 საათზე, თბილისის იუსტიციის სახლში, ლეიკემიით დაავადებული ბავშვების დასახმარებლად სისხლის ჩაბარების აქცია განხორციელდება. აქციაში მონაწილეობას იუსტიციის სახლის რამდენიმე ათეული თანამშრომელი მიიღებს.
იუსტიცის სახლის საზოგადოებასთან ურთიერთობის სამსახურის ინფორმაციით, გაღებული სისხლით იუსტიციის სახლი, ამჯერად იაშვილის სახელობის ბავშვთა რესპუბლიკური საავადმყოფოს ონკოჰემატოლოგიური განყოფილების პაციენტებს დაეხმარება.
„გასულ ჯერზე იუსტიციის სახლს თანამშრომლების მიერ გაღებული 9 ლიტრი სისხლი ლეიკემიით დაავადებულ ბევრ ბავშვს დაეხმარა. გვსურს აქცია ისევ გავიმეოროთ და გავიღოთ ის მცირეოდენი, რის გაკეთებაც ლეიკემიით დაავადებული პატარა მეგობრებისთვის შეგვიძლია,"- აღნიშნა იუსტიციის სახლის მენეჯერმა გივი ჭანუყვაძემ.
„იუსტიციის სახლი" სრულიად ახალი კონცეფციის მქონე საჯარო დაწესებულებაა, სადაც იუსტიციის სამინისტროს უწყებების სერვისები სისტემურად არის თავმოყრილი და მომხმარებელს საშუალებას აძლევს ერთ სივრცეში მიიღოს 300-ზე მეტი სახის მომსახურება. მომხმარებლისთვის მომსახურების გაწევის ლოდინის საშუალო დრო ორმოცდახუთი წამიდან წუთნახევრამდე მერყეობს. ამჟამად იუსტიციის სახლი საქართველოს მასშტაბით 12 ფილიალითაა წარმოდგენილი. ყოველდღიურად თბილისის, გორის, ოზურგეთის, გურჯაანის, თელავის, ქუთაისის რუსთავის, ბათუმის, ყვარლის, მარნეულის, ახალციხისა და მესტიის იუსტიციის სახლებში მომსახურებას 20 000-ზე მეტი მომხმარებელი იღებს. 2012 წელს, იუსტიციის სახლი სახელმწიფო სერვისების გაუმჯობესებისათვის დაწესებულ ნომინაციაში, მსოფლიოს ერთ-ერთი ყველაზე პრესტიჟული ჯილდოს მფლობელი, გაერთიანებული ერების ორგანიზაციის გამარჯვებული გახდა.